- २६ भाद्र २०८३, शुक्रबार / Sep 11, 2026
१८ सामाजिक संजालमा निकै भाइरल भएको मलेसियामा नेपाली कामदारमाथि कुटपिट गर्ने मानिस पनि नेपाली नै भएको थाहा भएको छ । भिडियोमा कम्पनीमा सिनियर देखिने व्यक्तिले नेपाली सुरक्षागार्डलाई पशुजस्तै निर्घात कुटपिट गरिरहेका छन् ।
अपार्टमेन्टको पार्किङमा कुटिरहेका नेपाली श्रमिकलाई मले भाषामा गाली गर्दै कुटिरहेका छन् भने नेपाली श्रमिक चुपचाप पिटाइ खाइरहेका छन् । भिडियो खिचिरहेका व्यक्तिले भैगो छोडिदेऊ भनिरहेका छन् । सो भिडियो भाइरल भइसकेपछि मलेसियास्थित नेपाली दूतावासले सूचना जारी गरेर व्यक्तिको बारेमा खोजीनीति गरेको थियो ।
उक्त भिडियोमाथि कमेन्ट गर्दै कुटपिट गर्नेलाई कडा सजायको माग गरेका छन् । अन्तत नेपाली कामदारमाथि कुटपिट गर्ने व्यक्ति पनि नेपाली नै भएको पत्ता लागेको छ । नेपाली सुरक्षागार्डमाथि कम्पनीका नेपाली सुपरभाइजरले नै निर्घात रूपमा कुटपिट गरेको मलेसियास्थित नेपाली दूतावासले जनाएको छ । पीडित नेपाली श्रमिक नेपाली दूतावासमा आश्रय लिइरहेको मलेसियाका लागि नेपाली राजदूत उदयराज पाण्डेले जानकारी दिए ।
पीडक नेपाली श्रमिक गैरकानुनी रूपमा मलेसियामा बस्दै आएको, पहिलो कम्पनी छोडी अहिलेको कम्पनीमा काम गर्न थालेको दूतावासले जनाएको छ । त्यस्तै दूतावासले पीडक श्रमिकलाई पनि सम्पर्क गरिसकेको जनाएको छ । कुटपिटको घटनालाई मलेसियास्थित नेपाली दूतावासले सोमबार प्रहरीमा केस दर्ता गर्ने जनाएको छ । आइतबार सार्वजनिक बिदा हुने भएकाले दूतावासले सोमबार मात्रै केस दर्ता गर्ने जनाएको छ ।
