महँगियो डिजेल र मट्टितेलको मूल्य

काठमाडौँ । नेपाल आयल निगम लिमिटेडले डिजेल र मट्टितेलको मूल्य प्रतिलिटर ६ रुपैयाँ वृद्धि गरेको छ । आजबाट लागू हुनेगरी मूल्यवृद्धि भएपछि डिजेल र मट्टितेलको भाउ प्रतिलिटर १ सय ७८ रुपैयाँ पुगेको छ ।

पछिल्लो समय लगातार तीन पटक मूल्य घटेर आउँदा गत आर्थिक वर्षको घाटालाई देखाएर नेपाली बजारमा मूल्य समायोजन गर्न नमानेको आयल निगमले नयाँ मूल्य पाउनासाथ मूल्य बढाएको हो ।

आइओसीले पठाएको नयाँ मूल्य अनुसार पेट्रोल १.३९ रुपैयाँ, डिजेल ६.१२ रुपैयाँ र हवाई इन्धन ८.०१ रुपैयाँ बढेर आएको थियो ।
त्यसपछि निगम सञ्चालक समितिको बैठक बसी मूल्य बढाउने निर्णय भएको हो ।

दसैँको मुखमा डिजेलको मूल्य बढ्दा सार्वजनिक यातायात र ढुवानीका साधनको भाडादर बढ्ने आकलन छ ।