- १६ श्रावण २०८३, शनिबार / Aug 1, 2026
भक्तपुर । वागीश्वरी माध्यमिक विद्यालय, च्याम्हासिंहमा २०७६ मा एसइई उत्तीर्ण विद्यार्थीहरुलाई बुधवारदेखि स्वास्थ्य मापदण्ड पालना गरी पाँच दिने बधाई तथा मार्गनिर्देशन कार्यक्रम शुरु भएको छ । सामाजिक दूरी कायम गरी पाँच समूहका विद्यार्थीहरुलाई छुट्टाछुट्टै विद्यालयमै बोलाई उक्त कार्यक्रम गरेको विद्यालय प्रशासनले जनाएको छ ।
उत्तीर्ण विद्यार्थीहरुलाई उच्च शिक्षा अध्ययनका लागि मार्गनिर्देशन दिएको उक्त कार्यक्रममा विद्यालय गतिविधि तथा भौतिक निर्माणसम्बन्धी जानकारी प्रदान गरिएको थियो । बुधवारदेखि शुरु भएको उक्त कार्यक्रममा विद्यार्थीहरुलाई बधाई तथा मार्गनिर्देशन दिदै विद्यालयका प्रधानाध्यापक कृष्णप्रसाद धन्छाले विद्यालय तह सकेपछि मात्र चरित्र निर्माणको तह सुरु हुने भएकोले अझ बढी मेहनत गर्नुपर्ने बताए ।
पूर्व सहायक प्रधानाध्यापक ज्ञानसागर प्रजापतिले विद्यार्थीहरुले जुनसुकै विषय लिएपनि विशेषज्ञता हासिल गर्ने गरी पढ्नुपर्नेमा जोड दिए । विद्यालयका सहायक प्रधानाध्यापक कृष्णप्रसाद कर्माचार्यले विद्यार्थीहरुले आन्तरिक मूल्यांकनबाट पाएको ग्रेडलाई ध्यानमा राखी उच्च शिक्षा अध्ययनको क्रममा पनि बढीभन्दा बढी ग्रेड प्राप्त गर्नुपर्ने बताए ।
शिक्षक विश्वेश्वर मानन्धरले सञ्चालन गरेको उक्त कार्यक्रममा शिक्षक उकेश सुवालले स्वागत गरेका थिए । प्रधानाध्यापक धन्छाले विद्यार्थीहरुलाई मायाको चिनो प्रदान गरेको उक्त कार्यक्रममा प्रत्येक दिन दुई जना विद्यार्थीहरुले विद्यालयमा पढ्दाको अनुभव व्यक्त गरेका थिए ।
३.६५ वा सोभन्दा माथि ४५ जना, ३.२५ वा सोभन्दा माथि ६९ जना, २.८५ वा सोभन्दा माथि ६९ जना, २.४५ वा सोभन्दा माथि ५४ जना र २.०५ वा सोभन्दा माथि २१ जनाले जीपीए प्राप्त गरी जम्मा २ सय ५८ जनाले उक्त विद्यालयबाट एसईई परीक्षा पूरा गरेको विद्यालय प्रशासनले जनाउको छ ।
९० प्रतिशतभन्दा बढी विद्यार्थीको भौतिक उपस्थितिमा भएको उक्त कार्यक्रम सोमबारसम्म हुनेछ । कार्यक्रममा वागीश्वरी कलेजका प्राचार्य धनकुमार श्रेष्ठ, शिक्षकहरु मैयाकेशरी कोजू, पूजा शाक्यलगायतले बधाई तथा मार्गनिर्देशन दिएका थिए ।
