सासुको मृत्युपछि बुहारीलाई टिकट

कपिलवस्तु । कपिलवस्तुको महाराजगञ्ज नगरपालिकामा उम्मेदवारको मृत्यु भएपछि उनको बुहारीलाई उम्मेदवार बनाएको छ ।

उपप्रमुख पदकी उम्मेदवार सुभावती कुर्मीको मृत्युपछि उनको जेठी बुहारी रिताकुमारी कुर्मीलाई नेपाली कांग्रेसले उम्मेदवार बनाएको हो । हृदयघातबाट सुभावतीको मृत्यु भएपछि निर्वाचन आयोगले निर्वाचन कार्यक्रम स्थगन गरेको थियो ।

त्यहाँ ३ जेठमा निर्वाचन हुने गरी आयोगले नयाँ निर्वाचन कार्यक्रम जारी गरेको छ । महाराजगञ्ज नगरपालिका–२ गैडहवाकी २८ वर्षीय रिताले सासुको सपना पूरा गर्न उम्मेदवारी दिएको बताएकी छन् ।

आयोगले ३ जेठमा निर्वाचन गर्ने गरी नयाँ निर्वाचन कार्यक्रम तालिका सार्वजनिक गरिएको निर्वाचन अधिकृत कुबेर पाण्डेले जानकारी दिए ।