- १८ असार २०८३, बिहीबार / Jul 2, 2026
सुर्खेत, १८ असार । दैलेखको चामुण्डा बिन्द्रासैनी नगरपालिका–७ साङ्गेताडास्थित कर्णाली राजमार्गमा फोर्स गाडी दुर्घटना हुँदा एक जनाको शव फेला परेको छ भने अन्य यात्रुको खोजी तथा उद्धार कार्य जारी रहेको छ।
सुर्खेतबाट कालिकोटतर्फ जाँदै गरेको कर्णाली प्रदेश ०२–००१ ख १०५५ नम्बरको फोर्स गाडी बुधबार बिहान करिब ११ः३० बजे अनियन्त्रित भई करिब ६०० देखि ७०० मिटर तल कर्णाली नदीमा खसेर दुर्घटनामा परेको हो।
दुर्घटनापछि सशस्त्र प्रहरी बल, नेपाल गुल्म दैलेख, माथिल्लो कर्णाली जलविद्युत् आयोजना सुरक्षा बेस तथा प्रहरी चौकी पाल्तडाबाट संयुक्त उद्धार टोली परिचालन गरिएको छ।
उद्धारका क्रममा दुर्घटनास्थलबाट करिब ४०० मिटर तल भिरमा अड्किएको अवस्थामा एक पुरुषको शव फेला परेको छ। शवलाई नेपाल प्रहरी र सशस्त्र प्रहरी बलको संयुक्त टोलीले सडकसम्म ल्याउने प्रयास गरिरहेको छ।
सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार दुर्घटनाग्रस्त गाडीमा कति जना सवार थिए भन्ने विवरण अझै यकिन हुन सकेको छैन। अन्य यात्रुको खोजी तथा उद्धार कार्य निरन्तर जारी रहेको छ।
