- ४ कार्तिक २०८३, बुधबार / Oct 21, 2026
काठमाडौँ, १० बैशाख । राष्ट्रिय विपद् जोखिम न्यूनीकरण तथा व्यवस्थापन प्राधिकरणले विपद् जोखिम न्यूनीकरणका लागि प्रभावकारी कार्ययोजनाका साथ अघि बढ्ने जनाएको छ।
सिंहदरबारमा बिहीबार बसेको राष्ट्रिय सभाअन्तर्गतको सङ्घीयता सबलीकरण तथा राष्ट्रिय सरोकार समितिको बैठकमा प्राधिकरणका कार्यकारी प्रमुख दिनेशप्रसाद भट्टले सबै जिल्लाबाट विपद् जोखिम न्यूनीकरणसम्बन्धी योजनाको जानकारी संकलन गरी प्रभावकारी कार्ययोजना तयार पारिने जानकारी दिएका हुन्।
उनका अनुसार विपद् जोखिम न्यूनीकरण योजनाका लागि प्रत्येक जिल्लाको कोषमा उपलब्ध रकम, सामग्री तथा प्राकृतिक प्रकोपपछिका गतिविधिहरूको विवरण संकलन गर्ने काम भइरहेको छ। वैशाख १५ गतेसम्म सबै जिल्लाबाट आवश्यक जानकारी प्राप्त भएपछि केही दिनमै चालु वर्षको विपद् जोखिम न्यूनीकरण योजना तयार गरिने उनले बताए।
भट्टले विपद् जोखिम न्यूनीकरणमा स्थानीय तहहरूको भूमिका महत्त्वपूर्ण हुने उल्लेख गर्दै पालिकाको सिफारिसका आधारमा जोखिम न्यूनीकरणसम्बन्धी तालिम सञ्चालन गरिँदै आएको जानकारी दिए।
त्यसैगरी विपद्का घटनामा प्रभावकारी रूपमा काम गर्ने व्यक्तिहरूलाई पुरस्कृत गर्ने व्यवस्था गर्न लागिएको पनि उनले बताए। विपद् घटना भएपछि नागरिकलाई छिटो राहत उपलब्ध गराउने तथा अस्थायी वासस्थानको व्यवस्थापनका लागि प्राधिकरणले स्थानीय पालिकासँग समन्वय गर्दै काम गरिरहेको जानकारी दिइएको छ।
बैठकमा समिति सदस्यहरूले मनसुन सुरु हुनुअघि नै विपद् जोखिम न्यूनीकरण तथा प्रतिकार्य तयारी अवस्थामा राख्नुपर्नेमा जोड दिएका थिए।
