- २९ श्रावण २०८३, शुक्रबार / Aug 14, 2026
वीरगञ्ज, २० पुस । धनुषामा मस्जिदमा तोडफोड र धार्मिक ग्रन्थ कुरान जलाइएको घटनाको विरोधमा आइतबार वीरगञ्जमा भएको प्रदर्शन उग्र बनेपछि प्रहरीले ५ राउण्ड अश्रुग्यास प्रहार गरेको छ ।
धनुषाको कमला नगरपालिकामा शनिबार भएको घटनाको विरोधमा वीरगञ्जका मुस्लिम समुदाय सडकमा उत्रिएका थिए । प्रदर्शनका क्रममा टायर बालेर सडक अवरुद्ध गरिएको थियो भने प्रदर्शनकारीले प्रहरीमाथि ढुङ्गामुढा गरेपछि अवस्था तनावपूर्ण बनेको थियो । छपकैया प्रहरी बिटमा तोडफोड भएपछि प्रहरीले भीड नियन्त्रणका लागि अश्रुग्यास प्रहार गरेको हो । पर्सा प्रहरीका डीएसपी राजु कार्कीका अनुसार प्रदर्शनकारीले प्रहरीमाथि आक्रमण गर्न थालेपछि बाध्य भएर अश्रुग्यास प्रयोग गरिएको हो । प्रहरीको कारबाहीपछि हाल वीरगञ्जको अवस्था सामान्य बन्दै गएको जिल्ला प्रहरी कार्यालय पर्साले जनाएको छ ।
वीरगञ्जको घण्टाघर, छपकैया लगायतका क्षेत्रमा बिहानैदेखि प्रदर्शन भएको थियो । प्रदर्शनकारीहरूले धनुषा घटनामा संलग्न दोषीमाथि कडा कारबाहीको माग गर्दै अल्पसंख्यक समुदायमाथि आक्रमण स्वीकार्य नहुने नाराबाजी गरेका थिए ।
के हो धनुषाको घटना ?
धनुषाको कमला नगरपालिका–६, सखुवा मरानस्थित मुस्लिम टोलको मस्जिदमा शनिबार तोडफोड गर्नुका साथै धार्मिक ग्रन्थ जलाइएको थियो । प्रहरीले उक्त घटनाको सुरुवात सामाजिक सञ्जालमा भाइरल भएको एक भिडियोबाट भएको जनाएको छ । धनुषा प्रहरी प्रमुख रुग्म कुँवरका अनुसार, सुरुमा दुई जना मुस्लिम युवकले हिन्दु समुदायको रक्षाबन्धन पर्वप्रति नकारात्मक सन्देश जाने भिडियो सामाजिक सञ्जालमा पोस्ट गरेका थिए । उक्त भिडियो सार्वजनिक भएपछि आक्रोशित स्थानीय युवाहरूले प्रहरी चौकी घेराउ गर्दै कारबाहीको माग गरेका थिए ।
प्रहरीले भिडियो पोस्ट गर्ने दुवै युवकलाई नियन्त्रणमा लिई कानुनी प्रक्रिया अघि बढाइरहेकै बेला केही युवाको समूहले मस्जिदमा आक्रमण गरेको प्रहरीको भनाइ छ । सोही घटनाको विरोधस्वरूप आइतबार वीरगञ्जमा प्रदर्शन भएको हो ।
