विशेष महाधिवेशनको औचित्य मंसिर १५ मै समाप्त भइसकेको छ : विमलेन्द्र निधि

काठमाडौं, १८ पुस । नेपाली कांग्रेसका पूर्वउपसभापति विमलेन्द्र निधिले पार्टीको विशेष महाधिवेशन अब आवश्यक नरहेको बताएका छन् । नियमित महाधिवेशनको कार्यतालिका सार्वजनिक भइसकेकाले विशेष महाधिवेशनको औचित्य मंसिर १५ गतेमै समाप्त भइसकेको उनको भनाइ छ ।

शुक्रबार पार्टीको कार्यसम्पादन समिति बैठकमा सहभागी हुन केन्द्रीय कार्यालय पुगेका निधिले सञ्चारकर्मीहरूसँग कुरा गर्दै विशेष महाधिवेशनको औचित्य समाप्त भइसकेको स्पष्ट पारे । “विशेष महाधिवेशनको औचित्य मंसिर १५ गते नै सकिएको हो,” उनले भने ।

विशेष महाधिवेशनका लागि हल बुक भइसकेको र महाधिवेशन हुने निश्चित भएको भन्ने चर्चा बारे पत्रकारले प्रश्न गर्दा निधिले छोटो प्रतिक्रिया दिँदै भने, “कसले भन्छ हुन्छ भनेर ? हुँदैन ।”

उनले पार्टी आगामी फागुन २१ गते हुने प्रतिनिधिसभा निर्वाचनको तयारीमा केन्द्रित रहेको पनि बताए । पार्टीभित्र देखिएको आन्तरिक विवादबारे कसरी अघि बढ्ने भन्ने प्रश्नमा भने निधिले कुनै प्रतिक्रिया दिएनन् ।