प्युठानमा चट्याङ लागेर बाबुछोराको मृत्यु, ४ जना घाइते

प्युठान, १४ बैशाख । प्युठानको गौमुखी गाउँपालिकामा आइतबार चट्याङ लागेर बाबुछोराको मृत्यु भएको छ । जिल्ला प्रहरी कार्यालय प्युठानका अनुसार वडा नम्बर ६ लिवाङका ७० वर्षीय केदार बोहोरा क्षेत्री र उनका २६ वर्षीय छोरा रामु बोहरा क्षेत्रीको चट्याङ लागेर मृत्यु भएको हो ।

गम्भीर घाइते भएका उनीहरूलाई उपचारका लागि अस्पताल लैजाने क्रममा बाटोमै मृत्यु भएको प्रहरीले जनाएको छ । मृतक दुवैजनाको शव जिल्ला अस्पतालमा राखिएको प्रहरीले जानकारी दिएको छ ।

यसै घटनामा गौमुखी गाउँपालिकाकै अन्य दुई जना घाइते भएका छन् । यस्तै, माण्डवी गाउँपालिका–२ रातापानीमा चट्याङ लागेर दुई दिदीबहिनी घाइते भएका छन् ।

घाइतेहरूको स्थानीय स्वास्थ्य संस्थामा उपचार भइरहेको प्रहरीले जनाएको छ । पछिल्ला दिनमा देशका विभिन्न स्थानमा चट्याङसहित वर्षा भइरहेकोले जोखिमबाट जोगिन सुरक्षित स्थानमा बस्न तथा सतर्कता अपनाउन सम्बन्धित निकायले आग्रह गरेका छन् ।