- २६ आश्विन २०८३, सोमबार / Oct 12, 2026
हुम्ला, १६ फागुन । प्रतिनिधि सभा निर्वाचन नजिकिँदै गर्दा नेपाल प्रहरीले चीन सीमा क्षेत्रमा गस्ती बढाएको छ ।
चीनसँग जोडिएको नाम्खा गाउँपालिका–६ स्थित लिमी लाप्चा क्षेत्रमा नेपाल प्रहरीको टोलीले पैदल गस्ती सुरू गरेको हो । निर्वाचनको समयमा हुन सक्ने सम्भावित अवाञ्छित गतिविधि नियन्त्रण गर्न र सीमावर्ती क्षेत्रको वस्तुस्थिति बुझ्न गस्ती सञ्चालन गरिएको प्रहरीले जनाएको छ ।
जिल्ला प्रहरी कार्यालय हुम्लाका अनुसार प्रहरी सहायक निरीक्षक मञ्जुल खड्काको कमाण्डमा ७ जनाको टोली नाम्खा गाउँपालिका–५ र ६ मा परिचालित भएको छ । टोलीले सीमावर्ती बस्ती, आवतजावतको अवस्था तथा सुरक्षा व्यवस्थाबारे अनुगमन गरिरहेको छ । जिल्ला प्रहरी कार्यालय हुम्लाका डीएसपी शंकर खड्काका अनुसार हिल्सा नाका हुँदै प्रहरी टोली लिमी लाप्चा पुगेको हो । निर्वाचनलाई शान्तिपूर्ण र निष्पक्ष बनाउन सीमाक्षेत्रमा निगरानी र गस्तीलाई थप प्रभावकारी बनाइएको उनले बताए ।
सीमावर्ती क्षेत्र संवेदनशील मानिने भएकाले निर्वाचन अवधिभर नियमित गस्ती जारी रहने प्रहरीले जनाएको छ । स्थानीय प्रशासन र सुरक्षा निकायबीच समन्वय गर्दै सुरक्षा सतर्कता अझै कडा बनाइने तयारी गरिएको छ ।
