- २२ श्रावण २०८३, शुक्रबार / Aug 7, 2026
एजेन्सी, पुष १२ । चीनले इन्टरनेट सेवाका लागि प्रयोग हुने उपग्रहहरूको एक समूह सफलतापूर्वक अन्तरिक्षमा प्रक्षेपण गरेको छ।चिनियाँ सञ्चारमाध्यम सिन्ह्वाका अनुसार ‘लङ मार्च–८ ए’ नामक रकेट दक्षिणी टापु प्रान्त हाइनानस्थित व्यावसायिक अन्तरिक्ष प्रक्षेपण केन्द्रबाट हिजो बिहान ७ बजेर २६ मिनेटमा प्रक्षेपण गरिएको हो।
उक्त रकेटले न्यून पृथ्वी कक्षमा इन्टरनेट उपग्रहहरूको १७औँ समूहलाई निर्धारित कक्षमा सफलतापूर्वक स्थापना गरेको जनाएको छ।‘लङ मार्च–८ ए’ चीनले विकास गरेको आधुनिक रकेट हो, जसको मुख्य उद्देश्य इन्टरनेट, सञ्चार तथा प्रविधिसम्बन्धी उपग्रहहरूलाई अन्तरिक्षमा पठाउनु हो। यो लङ मार्च रकेट शृङ्खलाको उन्नत संस्करण मानिन्छ।
उच्च सटीकता, विश्वसनीयता तथा व्यावसायिक र सरकारी प्रयोजनका लागि उपयुक्त क्षमताका कारण ‘लङ मार्च–८ ए’ चीनको अन्तरिक्ष कार्यक्रमको महत्त्वपूर्ण हिस्सा बनेको छ।
यो प्रक्षेपणसँगै चीनको अन्तरिक्षमा आधारित इन्टरनेट सञ्जाल विस्तारमा महत्त्वपूर्ण योगदान पुग्ने अपेक्षा गरिएको छ। चीनले विश्वव्यापी इन्टरनेट सेवा विस्तार गर्ने लक्ष्यसहित उपग्रह प्रक्षेपणलाई तीव्रता दिँदै आएको छ।
