- २२ श्रावण २०८३, शुक्रबार / Aug 7, 2026
काठमाण्डौ, पुष १३ । राष्ट्रिय स्वतन्त्र पार्टी (रास्वपा) र काठमाण्डौ महानगरपालिकाका मेयर बालेन शाहबीच सात बुँदे सहमति भएपछि नयाँ राजनीतिक ध्रुवीकरणको संकेत देखिएको छ । सहमति सार्वजनिक भएसँगै दुवै पक्षका समर्थकहरूमा उत्साह बढेको छ ।उनीहरूले वैकल्पिक र नयाँ शक्तिहरूबीचको एकताले मात्रै देशमा वास्तविक परिवर्तन सम्भव हुने विश्वास व्यक्त गरेका छन् ।
सहमतिपछि सामाजिक सञ्जालमार्फत प्रतिक्रिया जनाउँदै रास्वपाका सभापति रवि लामिछानेले सहमति नेताहरूले खोजेजस्तो नभई देशलाई आवश्यक परेको खालको हुनुपर्ने बताउनुभएको छ । उहाँले यो सहमति व्यक्तिगत लाभका लागि नभई दीर्घकालीन परिवर्तनका लागि गरिएको दाबी गर्नुभएको छ ।
लामो छलफलपछि मध्यराति रास्वपा र मेयर बालेन शाहबीच सात बुँदे सहमतिमा हस्ताक्षर भएको हो । सहमतिअनुसार पार्टीको नाम राष्ट्रिय स्वतन्त्र पार्टी (रास्वपा) नै रहने, चुनाव चिन्ह घण्टी नै रहने तय गरिएको छ । पार्टी सभापतिको जिम्मेवारी रवि लामिछानेले सम्हाल्ने र प्रतिनिधिसभा निर्वाचनपछि संसदीय दलको नेता तथा भावी प्रधानमन्त्रीको उम्मेदवारका रूपमा बालेन शाह अघि बढ्ने सहमति भएको छ ।
यसअघि उज्यालो नेपाल पार्टीलाई समेत समेटेर एकता प्रयास गरिएको भए पनि पार्टीका संरक्षक कुलमान घिसिङले पार्टीको अस्तित्वको प्रश्न उठाउँदै असहमति जनाउनुभएको थियो । पार्टीको नाम, चिन्ह र नेतृत्व सबै रास्वपाकै रहने सहमतिप्रति कुलमान असन्तुष्ट भएपछि उहाँ छलफलबाट बाहिरिनुभएको थियो ।
कुलमानको असहमतिपछि रास्वपाका सभापति रवि लामिछाने र मेयर बालेन शाहबीच गएराति अबेरसम्म भएको छलफलले अन्ततः सात बुँदे सहमतिमा टुंगो लागेको हो । यो सहमतिलाई आगामी चुनावी राजनीतिमा महत्त्वपूर्ण मोडका रूपमा हेरिएको छ ।
