- २२ श्रावण २०८३, शुक्रबार / Aug 7, 2026
काठमाण्डौ, १२ पुष । तराईका केही ठाउँमा आज दिनभर हुस्सु लाग्ने सम्भावना रहेको छ। जल तथा मौसम पूर्वानुमान महाशाखाका अनुसार तराई क्षेत्रमा अहिले बिहानदेखि नै हुस्सु तथा कुहिरो लागेको छ।
महाशाखाका अनुसार दिउँसो पनि तराईमा हुस्सुको प्रभाव कायमै रहनेछ। हाल देशभर पश्चिमी वायूको आंशिक प्रभाव रहेको छ। यसका कारण गण्डकी, कर्णाली र सुदूरपश्चिम प्रदेशमा मौसम आंशिक बदली रहेको छ भने बाँकी पहाडी तथा हिमाली भू–भागमा मौसम मुख्यतया सफा रहने अनुमान गरिएको छ।
पुस लागेसँगै बढ्दै गएको चिसोले विशेषगरी तराई तथा मधेश क्षेत्रमा जनजीवन प्रभावित बनाएको छ। चिसोका कारण दैनिक जनजीवनसँगै पशुचौपाया र कृषि बालीमा समेत असर परेको छ। काठमाण्डौ उपत्यकासहित देशका अन्य धेरै ठाउँमा पनि चिसो बढ्दो क्रममा रहेको छ।
महाशाखाका अनुसार आज बिहान पौने ६ बजे काठमाण्डौको न्यूनतम तापक्रम ५ दशमलव २ डिग्री सेल्सियस मापन गरिएको छ। हिजो बिहान पौने ६ बजे न्यूनतम तापक्रम ५ दशमलव ४ डिग्री सेल्सियस रहेकोमा पछि पौने ९ बजे घटेर ५ डिग्री सेल्सियसमा झरेको थियो।
चिसो र हुस्सुका कारण स्वास्थ्य, यातायात तथा दैनिक गतिविधिमा सतर्कता अपनाउन महाशाखाले सर्वसाधारणलाई आग्रह गरेको छ।
