काठमाण्डौमा चिसो बढ्यो, तराईमा आज पनि हुस्सु र कुहिरो

काठमाण्डौ, ११ पुष । काठमाण्डौ उपत्यकामा आज हिजोको तुलनामा चिसो बढेको छ। हिजो बिहान बादल लागेकाले चिसो केही कम महसुस भए पनि आज आकाश सफा रहेकाले चिसो बढेको मौसम पूर्वानुमान महाशाखाले जनाएको छ।

महाशाखाका अनुसार हिजो बिहान काठमाण्डौ उपत्यकाको न्यूनतम तापक्रम ७.५ डिग्री सेल्सियस रहेकोमा आज घटेर ५.४ डिग्री सेल्सियस पुगेको छ।

हाल देशभर पश्चिमी वायुको आंशिक प्रभाव रहेको महाशाखाले जनाएको छ। यसका कारण तराईका धेरै ठाउँमा आज पनि हुस्सु र कुहिरो लागेको छ। कोशी प्रदेश, बागमती प्रदेश र गण्डकी प्रदेशका पहाडी तथा हिमाली भूभागमा आंशिक बदली रहेको छ।

महाशाखाका अनुसार आज दिउँसो पनि तराईका धेरै स्थानमा हुस्सु र कुहिरो रहनेछ। कोशी, मधेश र बागमती प्रदेशका तराई भूभागमा बिहान केही समय र बाँकी तराई भूभागमा मध्यान्नसम्म कुहिरो लाग्ने सम्भावना रहेको छ।

तराई क्षेत्रमा हुस्सु तथा कुहिरोका कारण बिहानको समयमा दैनिक जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने भएकाले आवश्यक सतर्कता अपनाउन मौसम पूर्वानुमान महाशाखाले अनुरोध गरेको छ।