- २१ श्रावण २०८३, बिहीबार / Aug 6, 2026
नवलपरासी, १६ पुष । नारायणगढ–बुटवल सडकखण्डअन्तर्गत दाउन्ने क्षेत्रमा सोमबार बिहानदेखि अवरुद्ध सडक अझै सञ्चालनमा आउन सकेको छैन। केही दिनदेखि जारी शीतलहरका कारण सडक चिप्लो तथा हिलाम्मे बनेपछि यातायात व्यवस्था प्रभावित भएको हो।
दाउन्नेस्थित खुर्सानी खोलाको आसपास सडक अत्यधिक चिप्लो हुँदा सवारीसाधन उकालो चढ्न नसक्ने र चिप्लिने समस्या देखिएको छ। यस कारण सोमबार बिहानदेखि नै राजमार्गमा सवारी जामको स्थिति सिर्जना भएको छ।
जिल्ला ट्राफिक प्रहरी कार्यालय नवलपरासी (बर्दघाट सुस्तापूर्व)का सूचना अधिकारी प्रहरी वरिष्ठ नायब निरीक्षक विनोद जोशीका अनुसार सवारीसाधनको जाम विस्तारै हटाउने प्रयास भइरहेको छ। बाक्लो हुस्सु र चिप्लो सडकले सवारी सञ्चालनमा थप कठिनाइ उत्पन्न गरेको उनले बताए।
जोशीका अनुसार दाउन्नेबाट दुम्कीबास जङ्गल क्षेत्रसम्म करिब एक हजार पाँच सय सवारीसाधन जाममा फसेका छन्। यात्रुहरू लामो समयदेखि सडकमै अलपत्र परेका छन्।
यसैबीच, नारायणगढ–बुटवल सडक योजना पश्चिम खण्डका सूचना अधिकारी ई. विकास खनालले निर्माणाधीन क्षेत्रमा शीतलहरको प्रभाव अझ बढिरहेको जानकारी दिए। मौसम अनुकूल नभएकाले सडक खुलाउन कठिनाइ भइरहेको उनको भनाइ छ।
