- २२ असार २०८३, सोमबार / Jul 6, 2026
एजेन्सी, ६ वैशाख । भारतको राजधानी नयाँ दिल्लीको मुस्तफावाद क्षेत्रमा शनिबार बिहान भीषण दुर्घटना भएको छ । बिहान करिब २:३० बजे आएको भारी वर्षा र आँधीका कारण चार तले भवन भत्किँदा कम्तीमा चार जनाको ज्यान गएको पुष्टि भएको छ ।
उक्त भवनको भग्नावशेषमा अझै पनि १० जनाभन्दा बढी मानिस फसेको आशंका गरिएको छ। घटनास्थलमा राष्ट्रिय आपदा मोचन बल (NDRF) र दिल्ली प्रहरीको टोली पुगेर उद्दार कार्य तीव्र पारिएको छ । डिभिजनल अग्नि नियन्त्रक राजेन्द्र अटवालले बिहान करिब २:५० बजे दुर्घटनाको जानकारी प्राप्त भएको र तुरुन्तै उद्दार टोली परिचालन गरिएको जानकारी दिए । “हामी घटनास्थलमा पुगेपछि चार तले भवन पूर्णरूपमा भत्किएको र मानिसहरू भग्नावशेषमा फसेको देख्यौँ,” उनले भने, “प्रहरीको सहयोगमा उद्धार कार्य अघि बढाइएको छ।”
शुक्रबार रातिको मौसम परिवर्तनपछि दिल्लीका धेरै भागमा क्षति पुगेको जनाइएको छ। तेज वर्षा र आँधीबेहरीकै कारण मुस्तफावादस्थित भवन भत्किएको प्रारम्भिक अनुमान गरिएको छ।
अधिकारिहरूका अनुसार उद्धार कार्य जारी छ र घाइतेहरूको अवस्था तथा थप क्षतिका विवरण संकलन भइरहेको छ।
