- २७ भाद्र २०८३, शनिबार / Sep 12, 2026
काठमाडौँ, ६ वैशाख । बढ्दो जनघनत्व र तीव्र गतिमा थपिँदै गइरहेका सवारी साधनहरूले काठमाडौँ उपत्यकामा ट्राफिक व्यवस्थापन झन् जटिल बनाएको छ। दैनिकजसो अफिस समयको भीडमा सडकमा हुने लामो जाम सर्वसाधारणका लागि पीडादायक बन्दै गएको छ।
यही समस्या समाधान गर्न सरकारद्वारा अर्बौँ रुपैयाँ लगानीमा करिडोर सडकहरूको निर्माण र विस्तार तीव्र गतिमा भइरहेको छ। धोबीखोला, बागमती, विष्णुमती, मनोहरा र नक्खुखोला करिडोर सडकहरू विकल्पका रूपमा देखा परेका छन्। यी सडकहरूले काठमाडौँ, ललितपुर र भक्तपुर जिल्लाबीचको आवागमनलाई केही हदसम्म सहज बनाएका छन् ।
तर यी करिडोर सडकहरू पूर्णरूपमा समस्यामुक्त भने छैनन्। मुख्य सडकहरूमा बनाइएका पुलहरू अत्यन्तै होचा छन्, जसका कारण ठूला सवारी साधनहरू सहज रूपमा गुड्न सक्दैनन् । त्यसमाथि, अविरल वर्षाको समयमा खोलाहरूमा पानीको बहाव तीव्र हुने र बस्तीको ढल मिसिएर करिडोरका पुलहरू जलमग्न हुने समस्या पनि देखिएको छ । जसका कारण ती क्षेत्रमा सवारी साधन फस्ने जोखिमसमेत रहन्छ ।
सरकारले अब यस्ता समस्या समाधानका लागि एकीकृत सहरी पूर्वाधारमार्फत करिडोर सुधार्ने योजना अघि सारेको छ। यदि यी सडकहरूको उचित व्यवस्थापन र स्तरोन्नति गर्न सकियो भने उपत्यकाको ट्राफिक समस्याको दीर्घकालीन समाधानको रूपमा करिडोर सडकहरू ठहरिन सक्ने देखिन्छ ।
