- ५ असार २०८३, शुक्रबार / Jun 19, 2026
काठमाडौं, १४ फागुन । चुनावको सरगर्मी चलिरहेका बेला शेरबहादुर देउवा उपचारका लागि सिंगापुर प्रस्थान गरेका छन् । विमानस्थल स्रोतका अनुसार उनी गएराति १२ बजे Singapore Airlines को विमानबाट उडेका हुन् ।
प्रहरी स्रोतले त्रिभुवन अन्तर्राष्ट्रिय विमानस्थलबाट उनको प्रस्थान पुष्टि गरेको छ । उनकी पत्नी आरजु राणा देउवा भने तीन दिनअघि नै सिंगापुर पुगेकी थिइन् । राजनीतिक रूपमा भने देउवा पछिल्लो समय अन्योलमा देखिएका थिए । नेपाली कांग्रेस विशेष महाधिवेशनपछि नेतृत्व गगन थापाको हातमा गएपछि उनी सक्रिय भूमिकामा देखिएका थिएनन् । गृहजिल्ला डडेलधुराका समर्थकहरूले मतदान गर्न भए पनि आउने अपेक्षा गरेका थिए तर अहिले त्यो सम्भावना समाप्त भएको बताइन्छ ।
सभापति थापाले टिकट नदिएपछि देउवा निर्वाचन प्रक्रियाबाट बाहिरिएका हुन् । साथै पार्टीको आधिकारिकतासम्बन्धी विवाद सर्वोच्च अदालतमा विचाराधीन रहेकाले उनी थप असमञ्जसमा रहेको निकट स्रोतहरू बताउँछन् ।
यद्यपि थापा पक्षीय नेताहरूले देउवासँग सहकार्यको प्रयास भने जारी राखेको जनाइएको छ । २०४८ सालदेखि लगातार सात पटक डडेलधुराबाट चुनाव जितेका देउवा यस पटक भने निर्वाचनमा सहभागी नहुने उनको सचिवालयले जनाएको छ ।
कांग्रेस प्रवक्ता देवराज चालिसेले भने पूर्वसभापति सिंगापुर गएको विषयमा आफूहरूलाई औपचारिक जानकारी नभएको प्रतिक्रिया दिएका छन् ।
यसअघि पनि स्वास्थ्य उपचारकै क्रममा देउवा दम्पत्ति सिंगापुर गएका थिए र करिब १८ दिनपछि स्वदेश फर्किएका थिए ।
