- २६ आश्विन २०८३, सोमबार / Oct 12, 2026
धनुषा, १६ फागुन । धनुषामा एक युवकको बीभत्स हत्या गरिएको घटनामा संलग्न रहेको आरोपमा प्रहरीले मृतककी प्रेमिका र उनका परिवारका सदस्यसहित तीन जनालाई पक्राउ गरेको छ ।
जिल्ला प्रहरी कार्यालय धनुषा ले पत्रकार सम्मेलन गर्दै घटनाको विस्तृत विवरण सार्वजनिक गरेको हो । गत फागुन १४ गते अपरान्ह करिब ४ बजे औरही गाउँपालिका–६ चक्करस्थित भित्री सडक खण्डभन्दा करिब ३०० मिटर पूर्व मसुरी खेतमा एक युवकको शव फेला परेको थियो ।
घाँटी रेटिएको अवस्थामा फेला परेको शवको पहिचान हंसपुर नगरपालिका–९ बुदौल (रुदौली) निवासी १८ वर्षीय सुमितकुमार मण्डलका रूपमा भएको प्रहरीले जनाएको छ । उनी सगरमाथा माध्यमिक विद्यालयमा कक्षा ११ मा अध्ययनरत थिए ।
प्रहरीको प्रारम्भिक अनुसन्धानअनुसार सुमित र हंसपुर नगरपालिका–६ सोनिगामा बस्ने १७ वर्षीया काजल कुमारी मण्डलबीच विगत एक वर्षदेखि प्रेम सम्बन्ध रहेको खुलेको छ । फागुन १३ गते साँझ काजलले घरमा कोही नभएको मौका छोपी सुमितलाई भेट्न बोलाएकी थिइन् । त्यसक्रममा परिवारका सदस्यहरूले उनीहरूलाई आपत्तिजनक अवस्थामा फेला पारेपछि विवाद सुरु भएको प्रहरीको भनाइ छ ।
रुग्मबहादुर कुँवर का अनुसार काजलका दाजु २० वर्षीय दीपेशकुमार मण्डल र काकाका छोरा २९ वर्षीय परमेश्वर मण्डलले सुमितको हात बाँधेर मोटरसाइकलमा राखी घरदेखि करिब डेढ किलोमिटर टाढा मानव बस्ती नभएको मसुरी खेतमा लगेको अनुसन्धानबाट खुलेको छ । त्यहाँ धारिलो हतियार (खुकुरी) प्रहार गरी घाँटी रेटेर हत्या गरिएको प्रहरीले जनाएको छ ।
हत्यापछि प्रमाण लुकाउन सुमितको मोटरसाइकल विदेह नगरपालिका–१ स्थित एक साथीको घरमा लुकाइएको थियो । प्रहरीले मोटरसाइकल , खुकुरी र हात बाँध्न प्रयोग गरिएको डोरी बरामद गरेको जनाएको छ ।
पक्राउ पर्नेहरूमा काजल कुमारी मण्डल , दीपेशकुमार मण्डल र परमेश्वर मण्डल रहेका छन् । उनीहरूमाथि कर्तव्य ज्यान मुद्दामा थप अनुसन्धान भइरहेको प्रहरीले जनाएको छ ।
एसपी कुँवरका अनुसार धनुषामा पछिल्लो समय भएका ६ वटा हत्याका घटनामध्ये ४ वटाको सफल अनुसन्धान गरी संलग्नहरूलाई कानुनी दायरामा ल्याइसकिएको छ भने बाँकी घटनाको पनि सूक्ष्म अनुसन्धान जारी रहेको छ ।
