- २९ भाद्र २०८३, सोमबार / Sep 14, 2026
एजेन्सी । इस्लामिक सहयोग संगठन को कार्यकारी समितिको विदेशमन्त्री स्तरीय आपतकालिन बैठकले इजरायलद्वारा कब्जा गरिएका प्यालेस्टाइन क्षेत्रहरूमा बस्ती विस्तार गर्ने कदमको कडा विरोध गरेको छ ।
बैठकपछि जारी विज्ञप्तिमा संगठनले इजरायल ले कब्जा गरिएका प्यालेस्टाइन क्षेत्र हरूमा बस्ती विस्तार गर्ने नीतिलाई अस्वीकार्य ठहर गरेको छ । यस्तो कदमले क्षेत्रीय शान्ति प्रयासलाई कमजोर बनाउने उल्लेख गरिएको छ ।
बैठकले इजरायलस्थित अमेरिकी राजदूत माइक हकाबीको टिप्पणीको पनि निन्दा गरेको छ । साथै अमेरिकी दूतावासले कब्जा गरिएको वेस्ट बैंक का इजरायली बासिन्दालाई कन्सुलर सेवा प्रदान गर्ने निर्णयको आलोचना गर्दै यसले प्यालेस्टाइन र अरब भूमिमा इजरायलको नियन्त्रणलाई प्रोत्साहन गर्ने ठहर गरेको छ ।
सहभागीहरूले अमेरिकी राष्ट्रपति डोनाल्ड ट्रम्प ले अघि सारेको योजनाको कार्यान्वयनलाई अगाडि बढाउन , दोस्रो चरणमा प्रवेश गर्न , गाजा पट्टी मा पूर्ण र दिगो युद्धविराम सुनिश्चित गर्न , इजरायली सेनाको पूर्ण फिर्ता र मानवीय सहायता निर्बाध रूपमा उपलब्ध गराउन आह्वान गरेका छन् । बैठकले प्यालेस्टाइन राज्यको पुनर्निर्माण र पुनस्र्थापनाको प्रयासमा समर्थन व्यक्त गर्दै गाजा पट्टी र वेस्ट बैंकसहित सम्पूर्ण प्यालेस्टाइन क्षेत्रको एकता पुनः पुष्टि गरेको छ । साथै इजरायली नीतिहरूविरुद्ध राजनीतिक तथा कानुनी उपायहरू अपनाउने निर्णय गरिएको जनाइएको छ ।
अन्तर्राष्ट्रिय समुदायलाई प्यालेस्टाइन जनतालाई संरक्षण प्रदान गर्न आह्वान गर्दै इजरायललाई कथित उल्लंघनका लागि जवाफदेही बनाउने प्रयासलाई समर्थन गरिएको छ ।
बैठकले मध्यपूर्वमा बढ्दो तनाव , इरानविरुद्ध बल प्रयोग गर्ने धम्की तथा सैन्य शक्ति विस्तारसम्बन्धी गतिविधिप्रति गम्भीर चिन्ता व्यक्त गरेको छ । सैन्य तनाव बढ्दा क्षेत्रीय तथा विश्व शान्ति , आर्थिक स्थिरता र ऊर्जा सुरक्षामा गम्भीर असर पर्न सक्ने चेतावनी समेत दिइएको छ ।
