- २७ असार २०८३, शनिबार / Jul 11, 2026
काठमाण्डौ । आरएनपी एआर प्रणाली गौतमबुद्ध अन्तर्राष्ट्रिय विमानस्थलमा जडान हुने भएको छ । भिजिबिलिटीको समस्या भोगिरहेको उक्त विमानस्थलमा आईएलएस प्रणाली जडान गर्न भारतले अनुमति नदिएपछि आरएनपी एआर प्रणाली जडान हुने भएको हो ।
माघ १० गतेदेखि आरएनपी–एआर प्रणाली शुरू हुने नेपाल नागरिक उड्डयन प्राधिकरणले जनाएको छ । आरएनपी–एआर प्रणालीको सहायताले गौतमबुद्ध अन्तर्राष्ट्रिय विमानस्थलमा न्यूनतम आठ सय मिटरको भिजिबिलिटीमा जहाजहरु सहजरुपमा उडान र अवतरण हुनसक्ने प्राधिकरणले जनाएको छ ।
विश्वका धेरै देशका विमानस्थलहरुमा र वायुसेवामा प्रयोग भइसकेको यो प्रणाली भू–उपग्रहमा आधारित हुन्छ । उपकरणमा आधारित उडान अवतरण प्रणाली (आईएलएस) प्रविधिको विकल्पमा आरएनपी–एआर भनेर चिनिने प्रविधि त्रिभूवन अन्तर्राष्ट्रिय विमानस्थलमा यसअघि नै प्रयोगमा आइसकेको छ ।
त्रिभूवन अन्तर्राष्ट्रिय विमानस्थलमा रहेको आरएनपी–एआर प्रणालीले ११ सय मिटरको न्यूनतम भिजिबिलिटिमा काम गर्छ भने गौतमबुद्ध अन्तर्राष्ट्रिय विमानस्थलमा आठ सय मिटरको भिजिबिलिटिमा काम गर्ने प्राधिकरणले जनाएको छ । भू–उपग्रहमा आधारित हुने यो प्रणालीले भिजिबिलिटीको कारणले उडान र अवतरणमा आइरहने अवरोध हटाउने जनाएको छ ।
