दक्षिण कोरियाको सत्तारूढ दलले राष्ट्रपतिलाई महाअभियोग लगाउने प्रस्तावको समर्थन

एजेन्सी । फेरि दक्षिण कोरियाका राष्ट्रपति यून सुक योलविरुद्ध महाअभियोग प्रस्ताव अघि बढेको छ । विपक्षी दलहरुले फेरि संसदमा महाअभियोग प्रस्ताव अघि बढाएका हुन । अघिल्लो हप्ता भएको मतदानमा महाअभियोगबाट उनी जोगिएका हुन ।

विहीबार टेलिभिजनबाट सम्बोधन गर्दै राष्ट्रपति योलले सैनिक शासन लगाउने आफ्नो निर्णय न्यायोचित भएको र राष्ट्रपति पदबाट राजीनामा नदिने बताए । महाअभियोग प्रस्ताव दुई तिहाई मतबाट पारित गर्नुपर्छ ।

तीन सय सदस्यीय कोरियाको संसदमा राष्ट्रपति यूनको सत्तारूढ दल पिपल्स पावर पार्टी (पीपीपी) का एक सय आठ सांसद छन् । विपक्षीका एक सय ९० सांसद छन् । प्रस्तावमा शनिबार मतदान हुनेछ । यसपटक भने दक्षिण कोरियाको सत्तारूढ दलले पनि राष्ट्रपति योललाई महाअभियोग लगाउने प्रस्तावको समर्थन गर्ने भएको छ ।

अघिल्लो हप्ता महाअभियोगको प्रस्तावमा मतदान हुनुअघि राष्ट्रपतिले मार्सल कानून लागू गरेकोमा माफी मागेपछि सत्तारुढ पीपीपीका सांसदहरू मतदानमा उपस्थित भएनन् । तर राष्ट्रपतिले राजिनामा नदिइ अन्तिमसम्म लड्ने बताएपछि यस पटक सत्तारुढ पीपीपीका सांसदहरुले पनि महाअभियोगको प्रस्तावमा मतदान गर्ने भएका हुन् ।