- २८ असार २०८३, आईतवार / Jul 12, 2026
हुम्ला, १२ पुष । हुम्लाको खार्पुनाथ गाउँपालिका–२, थालीमा भएको आगलागीमा एक १६ महिने बालकको ज्यान गएको छ भने उनकी आमा घाइते भएकी छन्।
जिल्ला प्रहरी कार्यालय हुम्लाका अनुसार आगलागीमा १६ महिने रेबेन्द्र जेठाराको मृत्यु भएको हो। घटनामा उनकी आमा बर्रा जेठारा घाइते हुनुभएको छ।
रामराज जेठाराको घरमा हिजो साँझ आगलागी हुँदा मानवीय तथा ठूलो भौतिक क्षति भएको प्रहरीले जनाएको छ। प्रारम्भिक अनुसन्धान अनुसार खाना पकाउने क्रममा कोठाको छेउमा राखिएको पेट्रोलमा आगो सल्किएपछि आगलागी भएको अनुमान गरिएको छ।
आगलागीका कारण घर पूर्ण रूपमा जलेर नष्ट भएको खार्पुनाथ गाउँपालिका–२ का वडाध्यक्ष चन्द्र रावलले जानकारी दिनुभयो। स्थानीयबासीको सहयोगमा आगो नियन्त्रणमा लिइएको थियो।
घाइते बर्रा जेठाराको जिल्ला अस्पताल सिमकोटमा उपचार भइरहेको छ। उहाँको अवस्था सामान्य रहेको प्रहरीले जनाएको छ। घटनाबारे थप अनुसन्धान भइरहेको जिल्ला प्रहरी कार्यालय हुम्लाले जनाएको छ।
