- २२ श्रावण २०८३, शुक्रबार / Aug 7, 2026
गाजा, १४ पुष । इजरायलले गाजामा प्यालेस्टिनी पत्रकारका ७ सयभन्दा बढी आफन्तहरूको हत्या गरेको एक प्रतिवेदन सार्वजनिक भएको छ ।
प्यालेस्टिनी पत्रकार सिन्डिकेटलाई उद्धृत गर्दै समाचार संस्था अलजजीराले जनाएअनुसार सन् २०२३ को अक्टोबरमा गाजामा नरसंहार युद्ध शुरू भएयता इजरायली आक्रमणमा कम्तीमा ७ सय ६ जना प्यालेस्टिनी पत्रकारका परिवारका सदस्यहरूको ज्यान गएको छ ।
सिन्डिकेटको स्वतन्त्रता समितिद्वारा सार्वजनिक गरिएको प्रतिवेदनमा इजरायली सेनाले गाजामा जारी नरसंहार युद्धको रिपोर्टिङलाई दबाउन पत्रकारका परिवारलाई लक्षित गरी सामूहिक दण्डको नीति अपनाइरहेको उल्लेख गरिएको छ ।
स्वतन्त्रता समितिका प्रमुख मुहम्मद अल–लहहमले सन् २०२३ देखि २०२५ सम्म देखिएको आक्रमणको ढाँचाले गाजामा स्वतन्त्र पत्रकारिता दबाउने इजरायलको स्पष्ट मनसाय उजागर गरेको बताउनुभएको छ ।
समितिका अनुसार सन् २०२३ मा ४ सय ३६ जना, सन् २०२४ मा २ सय ३ जना र सन् २०२५ मा हालसम्म कम्तीमा ६७ जना पत्रकारका आफन्तहरूको हत्या भएको छ ।
धेरै परिवारहरू जबरजस्ती विस्थापित भई पाल तथा अस्थायी शिविरमा बस्न बाध्य भए पनि हवाई आक्रमण र गोलाबारीका कारण ज्यान गुमाउने क्रम रोकिएको छैन ।
पत्रकारितासँगको पारिवारिक सम्बन्धकै कारण सयौँ बालबालिका, महिला तथा वृद्धवृद्धा मारिनु अन्तर्राष्ट्रिय मानवीय र कानूनी मान्यताको गम्भीर उल्लङ्घन भएको समितिले ठहर गरेको छ ।
