- २६ असार २०८३, शुक्रबार / Jul 10, 2026
काठमाण्डौ, २२ पुष । आज कोशी, गण्डकी, कर्णाली र सुदूरपश्चिम प्रदेशका उच्च पहाडी तथा हिमाली क्षेत्रका एक/दुई ठाउँमा हल्का वर्षासहित हिमपातको सम्भावना रहेको छ । यी चार प्रदेशसहित देशका अधिकांश पहाडी तथा हिमाली भू–भागमा मौसम आंशिक बदली रहेको जल तथा मौसम पूर्वानुमान महाशाखाले जनाएको छ ।
तराई क्षेत्रमा भने धेरैजसो स्थानमा बाक्लो हुस्सु र कुहिरो लागेको छ । निरन्तरको हुस्सु र कुहिरोका कारण तराईको जनजीवन प्रभावित हुँदै आएको छ । चिसो बढेसँगै विपन्न वर्ग र दैनिक मजदुरी गर्नेहरू बढी मर्कामा परेका छन् भने बालबालिका, वृद्धवृद्धा तथा दीर्घरोगीहरू बिरामी पर्ने क्रम पनि बढेको छ ।
झापा, रौतहट, नवलपरासी, रुपन्देही, कपिलवस्तु, दाङ, बाँके, बर्दियालगायत तराईका विभिन्न जिल्लामा बाक्लो कुहिरोका कारण आवागमन, स्वास्थ्य सेवा र दैनिक गतिविधिमा असर परेको छ । केही स्थानीय तहले दाउरा र कम्बल वितरण गरे पनि राहत पर्याप्त नभएको स्थानीयको गुनासो छ ।
देशभर पश्चिमी वायुको आंशिक प्रभाव रहेको महाशाखाले जनाएको छ । उच्च पहाडी तथा हिमाली क्षेत्रका एक/दुई ठाउँमा हल्का वर्षा र हिमपात तथा तराईमा हुस्सु–कुहिरो कायम रहँदा दैनिक जनजीवन, पर्यटन, स्वास्थ्य र सडक यातायातमा आंशिक प्रभाव पर्न सक्ने भएकाले आवश्यक सतर्कता अपनाउन मौसमविद्हरूले आग्रह गरेका छन् ।
यसैबीच आज काठमाण्डौ उपत्यकामा चिसो थप बढेको छ । मौसम पूर्वानुमान महाशाखाका अनुसार आज बिहान पौने ६ बजे काठमाण्डौको न्यूनतम तापक्रम ३.४ डिग्री सेल्सियस मापन गरिएको छ । हिजो काठमाण्डौको न्यूनतम तापक्रम ३.५ डिग्री सेल्सियस रहेको थियो ।
