- २७ असार २०८३, शनिबार / Jul 11, 2026
नवलपरासी, १९ बैशाख । हुप्सेकोट गाउँपालिका ले ७६ जना सुत्केरी महिलालाई जनही पाँच हजार रुपैयाँका दरले पोषण खर्च उपलब्ध गराएको छ ।
चालु आर्थिक वर्ष २०८२/८३ अन्तर्गत सञ्चालन गरिएको ‘सुत्केरी स्याहार पोषण खर्च कार्यक्रम’ मार्फत गाउँपालिकाभित्रका सुत्केरी महिलालाई उक्त रकम प्रदान गरिएको हो ।
गाउँपालिका अध्यक्ष लक्ष्मीदेवी पाण्डे का अनुसार सुत्केरी आमाहरूलाई आवश्यक पोषण र स्याहारमा सहयोग पुगोस् भन्ने उद्देश्यले यो कार्यक्रम सञ्चालन गरिएको हो । “सुत्केरी अवस्थामा आमालाई आर्थिक सहयोग र पोषणको आवश्यकता बढी हुने भएकाले स्थानीय तहबाट सहयोगको व्यवस्था गरिएको हो,” उनले बताइन् ।
गाउँपालिकाले सबै वर्ग र समुदायका महिलालाई लक्षित गर्दै सुत्केरी समयमा आधारभूत पोषणको अभाव नहोस् भन्ने लक्ष्य राखेको जनाएको छ । सुत्केरी भएपछि सम्बन्धित महिलाको बैंक खातामा रकम पठाउने व्यवस्था गरिएको छ ।
गाउँपालिकाका प्रमुख प्रशासकीय अधिकृत वेदहरि अधिकारी ले यो कार्यक्रम मातृ तथा शिशु स्वास्थ्य सुधारका साथै महिला सशक्तीकरणको महत्वपूर्ण पहल भएको बताए । “पोषण खर्चसँगै स्वास्थ्य सल्लाह, नियमित जाँच र भिटामिन वितरण पनि सँगसँगै भइरहेको छ,” उनले भने ।
स्वास्थ्य शाखा प्रमुख कृष्णप्रसाद सापकोटा का अनुसार कार्यक्रमले गर्भवती महिलामा नियमित स्वास्थ्य परीक्षण गर्ने, स्वास्थ्य संस्थामै सुत्केरी हुने र नवजात शिशुको समयमै जन्म दर्ता गराउने बानीको विकास गराएको छ ।
गाउँपालिकाले गर्भावस्थामा कम्तीमा चार पटक स्वास्थ्य जाँच गरेको, स्वास्थ्य संस्थामा सुत्केरी भएको र जन्म दर्ता गरेको प्रमाण पेस गरेपछि मात्र उक्त रकम उपलब्ध गराउने व्यवस्था गरेको जनाएको छ ।
