उत्तर कोरिया–रुस सैन्य गठबन्धन बलियो: प्योङयाङमा ‘युद्ध स्मारक’ उद्घाटन

काठमाडौँ, १९ वैशाख । उत्तर कोरिया र रुसले आफ्नो सैन्य गठबन्धनलाई थप संस्थागत र दीर्घकालीन बनाउने दिशामा कदम चालेका छन् । प्योङयाङमा युक्रेन युद्धमा ज्यान गुमाएका उत्तर कोरियाली सैनिकहरूको सम्मानमा ‘मेमोरियल म्युजियम अफ कम्ब्याट फिट्स’ नामक युद्ध स्मारक उद्घाटन गरिएको छ ।
यसै क्रममा रुसी रक्षामन्त्री आन्द्रेई बेलोउसोभले उत्तर कोरियाली नेता किम जोङ-उनसँगको भेटमा सन् २०२७ देखि २०३१ सम्म लागू हुने नयाँ पाँच वर्षे रुस–उत्तर कोरिया सैन्य सहयोग योजना प्रस्ताव गरेका छन् । प्रस्तावित योजनाले हतियार आपूर्ति, सैन्य प्रविधि हस्तान्तरण र संयुक्त सैन्य अभ्यासलाई निरन्तरता दिने संकेत गरेको छ ।
विश्लेषकहरूका अनुसार उक्त योजना कार्यान्वयनमा आएमा उत्तर कोरिया–रुस सैन्य गठबन्धन अझै मजबुत भई स्थायी संस्थागत ढाँचामा रूपान्तरण हुन सक्छ । यो कदमले दुई देशबीचको रणनीतिक सहकार्यलाई युद्धपछिको अवस्थामा पनि कायम राख्ने स्पष्ट संकेत दिएको छ ।
स्मारक उद्घाटन समारोहमा किम जोङ-उनले ‘फासीवाद र प्रभुत्ववादी शक्तिहरू’ विरुद्धको साझेदारीलाई अझ सुदृढ बनाउनुपर्ने आवश्यकता औंल्याए । उनले बदलिँदो युद्ध परिवेश र सम्भावित संकटहरूका बीच संयुक्त शक्ति र सुरक्षा सहकार्य अपरिहार्य रहेको बताए ।