- १२ जेष्ठ २०८३, मंगलवार / May 26, 2026
एजेन्सी, ५ फागुन । मध्यपूर्व युद्धको २० औँ दिनमा कतारको रास लाफान इन्डस्ट्रियल सिटीस्थित विश्वकै ठूलो तरल प्राकृतिक ग्यास उद्योगमा इरानले मिसाइल आक्रमण गरेको छ । आक्रमणपछि उद्योगमा आगलागी भएको कतारको ऊर्जा कम्पनी कतार इनर्जीले जनाएको छ ।
अन्तर्राष्ट्रिय सञ्चारमाध्यमका अनुसार घटनामा ठूलो भौतिक क्षति पुगेको भए पनि मानवीय क्षति भने भएको छैन । आक्रमणपछि कतार सरकारले इरानी दूतावासका दुई उच्च अधिकारीलाई २४ घण्टाभित्र देश छोड्न आदेश दिएको छ । कतारले उक्त घटनालाई “क्षेत्रीय स्थिरतामाथि प्रत्यक्ष खतरा” को रूपमा लिएको जनाएको छ ।
यसैबीच, यूएई र साउदी अरबमा पनि ऊर्जा पूर्वाधारमाथि आक्रमणको प्रयास भएको भए पनि ती देशहरूले मिसाइल र ड्रोनहरू नष्ट गर्न सफल भएको बीबीसीले जनाएको छ । समाचारअनुसार यो आक्रमण इरानको दक्षिण पार्स ग्यास क्षेत्रमा भएको अघिल्लो आक्रमणको प्रतिशोधस्वरूप गरिएको हो ।
दक्षिण पार्स (इरान) र नर्थ फिल्ड (कतार) संयुक्त रूपमा विश्वकै सबैभन्दा ठूलो ग्यास क्षेत्र मानिन्छ । विज्ञहरूले यस घटनाले मध्यपूर्व क्षेत्रमा ऊर्जा आपूर्तिमा जोखिम बढ्ने र अन्तर्राष्ट्रिय बजारमा तेल तथा ग्यासको मूल्यमा अनिश्चितता थपिने चेतावनी दिएका छन् । आक्रमणपछि कतारले सुरक्षा सतर्कता उच्च बनाएको छ ।
