भारतको जम्मू कश्मीरमा बाढीमा परी मृत्यु हुनेको सङ्ख्या ४५ पुग्यो

काठमाण्डौ, ३० साउन । भारतको जम्मू कश्मीरको किश्तवाड क्षेत्रमा आरीघोप्टे वर्षापछि आएको आकस्मिक बाढीमा परी मृत्यु हुनेको सङ्ख्या ४५ पुगेको छ।

बीबीसी हिन्दीका अनुसार, मृतकमध्ये ३५ जनाको शव अस्पताल पुर्याइएको छ, जसमा ११ जनाको मात्र पहिचान भएको छ। बाढीमा परी १ सयभन्दा बढी घाइते भएका छन् भने मृतक सङ्ख्या अझै बढ्न सक्ने अनुमान गरिएको छ।

घाइतेमध्ये ७० जनालाई उपचारका लागि अस्पताल भर्ना गरिएको छ। उद्धार कार्यका लागि ६०–६० जनाका पाँच समूह बनाएर सुरक्षाकर्मीहरू परिचालित छन्।

यो घटना हिजो बिहान करिब साढे ११ बजे किश्तवाडको चाशोती क्षेत्रमा तीव्र वर्षापछि आएको आकस्मिक बाढीका कारण भएको हो।