- १२ भाद्र २०८३, शुक्रबार / Aug 28, 2026
काठमाडौं, १७ फागुन । निर्वाचन आयोगले सामाजिक सञ्जालमार्फत झुटा प्रचारको प्रवृत्ति अत्यधिक बढिरहेको जनाएको छ ।
निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले मौन अवधिको सन्दर्भमा आयोजित कार्यक्रममा बोल्दै झुटा तथा भ्रामक सामग्रीको नियन्त्रणका लागि आयोग सक्रिय रूपमा लागिरहेको बताए । निर्वाचन आयोग का अनुसार सामाजिक सञ्जालमार्फत फैलाइने गलत सूचना र एआई–सिर्जित डिपफेक सामग्रीको प्रयोग उल्लेख्य रूपमा बढेको छ ।
प्रेस काउन्सिल नेपालले आयोजना गरेको कार्यक्रममा उनले सञ्चार क्षेत्रले पनि गलत प्रचार रोक्न जिम्मेवार भूमिका खेल्नुपर्नेमा जोड दिए । आयोगको तथ्यांकअनुसार शुक्रबारसम्म ६१२ वटा हानिकारक सूचना ट्र्याक गरिएको छ । ती सूचनामाथि आवश्यक कारबाही प्रक्रिया अगाडि बढाइएको आयोगले जनाएको छ ।
विधुतीय कारोबार ऐन २०६३ आकर्षित हुने प्रकरणहरूलाई कारबाहीका लागि नेपाल प्रहरीमा पठाइएको छ । यस्तै निर्वाचन आचारसंहिता २०८२ उल्लंघनसँग सम्बन्धित सूचनालाई केन्द्रीय आचारसंहिता अनुगमन समितिमा पठाइएको छ ।
त्यसैगरी प्रेस काउन्सिल ऐन २०४८ अन्तर्गत पर्ने विषयहरू सम्बन्धित निकायमा पठाइएको आयोगले जानकारी दिएको छ ।
