सुखड बजारको होटलमा आगलागी, कामदारको जलेर मृत्यु

कैलाली, १२ बैशाख । कैलालीको घोडाघोडी नगरपालिका–१ सुखड बजारस्थित बिबेक रेस्टुरेन्ट एण्ड लजमा आगलागी हुँदा एक जना होटल कामदारको जलेर मृत्यु भएको छ।

जिल्ला प्रहरी कार्यालयका प्रवक्ता प्रहरी नायब उपरीक्षक योगेन्द्र तिमिल्सिनाका अनुसार आगलागीमा परी डडेल्धुराको आलिताल गाउँपालिका घर भएका मिनबहादुर बोहराको मृत्यु भएको हो।

शुक्रबार राति करिब पौने १ बजेतिर होटलको कोठामा सुतिरहेको अवस्थामा आगलागी भएपछि उनी जलेर गम्भीर अवस्थामा पुगेका थिए। प्रहरी र स्थानीयवासी तथा दमकलको सहयोगमा आगो नियन्त्रणमा लिइएको थियो।

प्रहरीका अनुसार प्रारम्भिक अनुसन्धानमा लामखुट्टे भगाउन बालिएको अण्डाको क्रेटबाट आगलागी सुरु भएको हुनसक्ने अनुमान गरिएको छ। घटनाबारे थप अनुसन्धान भइरहेको प्रहरीले जनाएको छ। मृतकको शव परीक्षणका लागि सेती प्रादेशिक अस्पतालमा राखिएको छ।