- २५ आश्विन २०८३, आईतवार / Oct 11, 2026
काठमाडौं, १५ फागुन । फागुन १८ गते मनाइने फागु पूर्णिमा (होली) का अवसरमा काठमाडौंमा सार्वजनिक स्थान र खुला सडकमा भेला भएर होली मनाउन निषेध गरिएको छ ।
जिल्ला प्रशासन कार्यालय काठमाडौंले सूचना जारी गर्दै प्रतिनिधिसभा सदस्य निर्वाचनको सुरक्षालाई मध्यनजर गर्दै सार्वजनिक स्थलमा होली खेल्न रोक लगाइएको जनाएको हो । प्रशासनले घरको कम्पाउन्डभित्र मात्रै मर्यादित रूपमा होली मनाउन आग्रह गरेको छ । यसअघि ठमेल, दरबारमार्ग र वसन्तपुरलगायत क्षेत्रमा मञ्च बनाएर साङ्गीतिक कार्यक्रम सञ्चालन गर्न अनुमति दिइने गरे पनि यस वर्ष त्यस्ता कार्यक्रम गर्न नपाइने सहायक प्रमुख जिल्ला अधिकारी मुक्तिराम रिजालले जानकारी दिएका छन् ।
प्रशासनले होलीका दिन मादक पदार्थ सेवन तथा बिक्री–वितरणमा समेत रोक लगाएको छ । त्यस्तै, होली खेल्ने क्रममा राजनीतिक दलका चुनाव चिन्ह तथा उम्मेदवारका तस्बिर अंकित भेष्ट, टिसर्ट, कमिज र गम्छाजस्ता सामग्री प्रयोग गर्न पनि पूर्ण रूपमा प्रतिबन्ध लगाइएको छ ।
निर्वाचन नजिकिँदै गर्दा सुरक्षा सतर्कता अपनाउँदै प्रशासनले नियम उल्लंघन नगर्न सर्वसाधारणलाई अनुरोध गरेको छ ।
