कृष्णमान प्रधानको सुनुवाइ सकियो, निर्णय अर्को बैठकबाट

काठमाडौं । निर्वाचन आयोगको आयुक्तका लागि सिफारिस कृष्णमान प्रधानको संसदीय सुनुवाइ सकिएको छ ।
बुधबार बसेको संसदीय सुनुवाइ समितिको बैठकमा प्रधानले आफ्नो कार्ययोजना प्रस्तुत गरेका थिए भने सांसदहरूले प्रधानसँग उजुरीबारे प्रश्न सोधेका थिए ।

जागिर लगाइदिने प्रलोभनमा पारेर निरन्तर यौन दुर्व्यवहार गरेको भन्दै प्रधानमाथि उजुरी परेको थियो।
सुनुवाइ समितिमा अधिकांश सांसदहरूले यही उजुरी केन्द्रित प्रश्न प्रधानलाई सोधेका छन्। तर प्रधानले सांसदहरूले सोधेका प्रश्न टार्न खोजे।

नेकपा (एमाले) की सांसद ईश्वरी घर्तीले प्रधानमाथि परेको यौन दुर्व्यवहार आरोपबारे प्रश्न सोधेकी थिइन्।
नेपाली कांग्रेसका सांसद जीवन परियारले निर्वाचन आयोगको आयुक्त हुनका लागि उच्च नैतिक चरित्र भएको मानिस हुनुपर्ने भएकोले प्रधानमाथिका आरोपले उच्च नैतिक चरित्र नदेखिएकोमा के प्रतिक्रिया छ भनेका थिए।