- २२ श्रावण २०८३, शुक्रबार / Aug 7, 2026
काठमाडौं । कास्कीको अन्नपूर्ण गाउँपालिकाबाट बेपत्ता भएका दुई स्पेनिस नागरिकमध्ये एक जनाको शव भेटिएको छ । प्रहरीको विशेष टोलीले पुरुष पर्यटकको शव मंगलबार भेटाएको हो । शव अन्नपूर्ण गाउँपालिकाकै भुरुङ्दी खोलामा फेला परेको जिल्ला प्रहरी कार्यालय कास्कीले जनाएकाे छ । घटनास्थल नजिकै गत आइतबार भेटिएका दुई वटा झोलामा राहदानी अनुसार स्पेनका ३७ वर्षीय इरिक सोलेर कासानोभास मृत भेटिएका हुन् ।
खोलामा लडेर बेपत्ता भएकामध्ये महिलाको अवस्था अझै अज्ञात छ । ती महिला पनि स्पेनकै ३२ बर्षिया मर्स मोलास जुन्का रहेको बताइएकाे छ । अन्नपूर्ण गाउँपालिका ९ तिखेढुङ्गाबाट उल्लेरी जाने क्रममा भुरुङ्दी खोलाको पुलमुनि रहेको पुरानो बाटो हिँड्ने क्रममा उनीहरूलाई खोलाले बगाएको सूचना स्थानीयवासीले प्रहरीलाइ दिएका थिए ।
ती पर्यटक आफू हिँड्नुपर्ने ‘रुट’ बाट बाहिर गएको देखिएको कार्यवाहक वडाध्यक्ष पुष्पा पुनले बताइन् । अहिले प्रयोगमा रहेको बाटो भन्दा फरक पुरानो बाटोमा पर्ने उक्त खोला र छहरा आकर्षक रहेको र मौसम पनि गर्मी भएकोले ती पर्यटक पानीमा खेल्दै छहराको दृश्यमा रमाउन जाँदा खसेको हुन सक्ने आशंका गरिएको छ ।
