- ७ कार्तिक २०८३, शनिबार / Oct 24, 2026
काठमाण्डौ, २२ पुष । मधेशी, थारु र मुस्लिम आयोगले सामाजिक सद्भाव बिथोलिने खालका कुनै पनि गतिविधि नगर्न सबै पक्षलाई आग्रह गरेका छन् ।
ती आयोगले संयुक्त विज्ञप्ति जारी गर्दै सबै धार्मिक सम्प्रदायबीच आपसी सद्भाव, सहिष्णुता र मैत्री कायम गर्न अपिल गरेका हुन् ।विज्ञप्तिमा नेपाली समाज सदियौँदेखि आपसी सद्भाव, सहिष्णुता र एक–अर्काप्रति सम्मान कायम गर्दै विभिन्न जातजाति, भाषाभाषी, संस्कृति, धर्म तथा सम्प्रदायबीच मिलेर बस्दै आएको उल्लेख गरिएको छ ।
तर पछिल्लो समय तराई–मधेशका केही स्थानमा धार्मिक सहिष्णुतामा खलल पुग्ने गतिविधि देखिएको भन्दै त्यसप्रति आयोगहरूले गम्भीर ध्यानाकर्षण गराएका छन् ।
आयोगले समाजमा विद्यमान आपसी विश्वास, भाइचारा र सामाजिक एकतालाई कमजोर पार्ने कुनै पनि उक्साहटपूर्ण गतिविधिबाट टाढा रहन सबै धार्मिक समुदाय, राजनीतिक दल, नागरिक समाज र सञ्चार माध्यमलाई संयुक्त रूपमा आग्रह गरेका छन् । सामाजिक सद्भाव र शान्ति कायम गर्नु सबैको साझा दायित्व भएको आयोगहरूको भनाइ छ ।
