- २५ आश्विन २०८३, आईतवार / Oct 11, 2026
काठमाडौं । माल्दिभ्सले इजरायली राहदानीमा प्रतिबन्ध लगाउने निर्णय गरेको छ । यो निर्णय लागू भएपछि इजरायली नागरिकले माल्दिभ्स प्रवेश गर्न पाउने छैनन् । माल्दिभ्सका गृहमन्त्री अली इहुसानले इजरायली राहदानी भएका मानिसलाई माल्दिभ्स प्रवेशमा प्रतिबन्ध लगाउने कानूनमा संशोधन गर्ने निर्णय भएको बताउनुभएको छ ।
मन्त्रिपरिषद्ले प्रक्रियालाई तिब्रता दिन विशेष समिति पनि गठन गरेको अन्तर्राष्ट्रिय समाचार संस्था अल जजिराले जनाएको छ । यसैबीच इजरायलले आफ्ना नागरिकलाई माल्दिभ्स नजान चेतावनी दिएको छ । त्यहाँ रहेका इजरायलीलाई जतिसक्दो छिटो फिर्ता हुन पनि इजरायलले आग्रह गरेको छ ।
इजरायल र गाजामा भईरहेको युद्धबारे धेरै देशले निन्दा गरिरहेका छन् । माल्दिभ्सले पनि इजरायलले गाजामा निरन्तर आक्रमण गरिरहेपछि इजरायली नागरिकलाई प्रतिबन्ध लगाउने निर्णय गरेको हो । यसबाहेक मन्त्रिपरिषद्ले प्यालेस्टाइनीहरूको लागि कोष जुटाउने र प्यालेस्टाइनलाई समर्थन गर्न मुस्लिम देशसँग छलफल गर्ने निर्णय गरेको छ । एजेन्सी
