- २६ असार २०८३, शुक्रबार / Jul 10, 2026
इस्लामाबाद । पाकिस्तानले अफगानिस्तानभित्र तालिबानका संरचनालाई लक्षित गर्दै हवाई हमला गरेको दाबी गरेको छ । हमलामा नंगरहार प्रान्तस्थित एक प्रमुख गोलाबारुद डिपोसहित महत्वपूर्ण सैन्य लक्ष्यहरू ध्वस्त पारिएको पाकिस्तानी पक्षले जनाएको छ ।
पाकिस्तानी सुरक्षा स्रोतका अनुसार बिहीबार साँझ अफगान तालिबानले पाकिस्तानी सीमा पोस्टहरूमा आक्रमण गरेपछि प्रतिकारस्वरूप हवाई कारबाही सुरु गरिएको हो । उक्त कारबाहीमा एक प्रमुख गोलाबारुद डिपो, तीन अफगान बटालियन र एक सेक्टर मुख्यालय पूर्णरूपमा नष्ट गरिएको दाबी गरिएको छ ।
यसैगरी ३६ भन्दा बढी ट्यांक, तोप तथा सशस्त्र व्यक्तिगत वाहकहरू ध्वस्त पारिएको जनाइएको छ । प्रधानमन्त्रीका प्रवक्ता मोशर्रफ जायदीले जारी गरेको विज्ञप्तिअनुसार पाकिस्तानी सेनाको कारबाहीमा ७२ अफगान लडाकु मारिएका छन् भने १२० भन्दा बढी घाइते भएका छन् । साथै १६ पोस्टहरू ध्वस्त पारिएको र सात अफगान पोस्ट कब्जा गरिएको दाबी गरिएको छ । यसअघि सूचना तथा प्रसारणमन्त्री अत्ताउल्लाह तरारले अफगान तालिबानले पाकिस्तान–अफगानिस्तान सीमास्थित पाकिस्तानी पोष्टहरूमा गोलीबारी गर्दा कम्तीमा दुई पाकिस्तानी सैनिकको मृत्यु भएको र तीन जना घाइते भएको बताएका थिए ।
तरारले सुरक्षा बलहरूले तत्काल र प्रभावकारी प्रतिक्रिया जनाएको उल्लेख गर्दै पाकिस्तानले आफ्नो क्षेत्रीय अखण्डता र नागरिक सुरक्षाका लागि आवश्यक सबै कदम चाल्ने स्पष्ट पारेका छन् । उता स्थानीय स्रोतका अनुसार अफगानिस्तानतर्फबाट प्रहार गरिएका मोर्टार गोला पाकिस्तानको उत्तर–पश्चिम खैबर पख्तुनख्वा प्रान्तको बाजौर जिल्लास्थित लगराई क्षेत्रमा खस्दा कम्तीमा एक महिलाको मृत्यु भएको र पाँच जना घाइते भएका छन् ।
पछिल्ला घटनाक्रमले दुई छिमेकी देशबीचको सीमा तनाव थप चर्किएको देखिएको छ । सीमा क्षेत्रमा पटक–पटक हुने द्वन्द्वले क्षेत्रीय सुरक्षामा चुनौती थपिएको छ ।
