- २६ आश्विन २०८३, सोमबार / Oct 12, 2026
काठमाडौं, १५ फागुन । आगामी २१ फागुनमा हुने प्रतिनिधिसभा सदस्य निर्वाचनका लागि देशभर दुई लाख २१ हजार कर्मचारी परिचालन गरिने भएको छ ।
निर्वाचन आयोगका अनुसार ७७ जिल्लाका १६५ निर्वाचन क्षेत्रअन्तर्गत रहेका २३ हजार ११२ मतदान केन्द्र तथा समानुपातिकतर्फ मात्र मत हाल्ने १४३ अस्थायी केन्द्रमा उक्त सङ्ख्यामा कर्मचारी खटाइनेछ । आयोगका सहायक प्रवक्ता प्रकाश न्यौपानेले पाँच सयभन्दा बढी मतदाता भएका मतदान केन्द्रमा नौ जना र पाँच सयभन्दा कम मतदाता भएका केन्द्रमा आठ जना कर्मचारी खटाइने व्यवस्था गरिएको जानकारी दिए ।
मतदान केन्द्रमा खटिने मतदान अधिकृत र सहायक मतदान अधिकृतलाई पूर्वप्रशिक्षण दिइसकिएको छ । त्यसपछि केन्द्रमा खटिने अन्य कर्मचारीलाई सम्बन्धित मतदान अधिकृतले नै प्रशिक्षण दिने व्यवस्था मिलाइएको आयोगले जनाएको छ ।
निर्वाचन प्रयोजनका लागि आवश्यक निर्वाचन सामग्री तथा मतपत्र बिहीबारसम्म देशभरका सबै १६५ निर्वाचन क्षेत्रमा पुर्याइसकिएको आयोगले स्पष्ट पारेको छ ।
