- २३ बैशाख २०८३, बुधबार / May 6, 2026
काठमाडौँ, १९ वैशाख । राष्ट्रिय स्वतन्त्र पार्टी (रास्वपा)ले रोल्पामा भएको जीप दुर्घटनाप्रति घटनाको दुई दिनपछि दुःख व्यक्त गरेको छ । पार्टीका प्रवक्ता मनिष झाले विज्ञप्ति जारी गर्दै दुर्घटनामा ज्यान गुमाएकाप्रति श्रद्धाञ्जली र घाइतेहरूको शीघ्र स्वास्थ्यलाभको कामना गरेका छन् ।
वि.सं. २०८३ वैशाख १७ गते रुकुम पूर्वबाट रोल्पाको थवाङ गाउँपालिका–जलजलातर्फ जाँदै गरेको जीप दुर्घटनामा परेर ठूलो मानवीय क्षति भएको थियो । रास्वपाले उक्त घटनालाई पीडादायी भन्दै यसले समाजलाई स्तब्ध बनाएको उल्लेख गरेको छ ।
विज्ञप्तिमा विकट भौगोलिक अवस्था हुँदाहुँदै पनि उद्धारमा खटिएका सुरक्षा निकाय र टोलीहरूको साहस र समर्पणको प्रशंसा गरिएको छ । साथै, यस्तो दुर्घटनाले सडक सुरक्षाको अवस्थाबारे गम्भीर प्रश्न उठाएको पनि पार्टीले जनाएको छ ।
रास्वपाले भविष्यमा यस्ता दुर्घटना न्यूनीकरण गर्न नीतिगत सुधार, सडक अनुशासनको कडा कार्यान्वयन र आवश्यक पूर्वाधार विकासमा जोड दिनुपर्ने बताएको छ ।
