आज देशका विभिन्न स्थानमा चट्याङसहित वर्षाको सम्भावना, केही ठाउँमा भारी वर्षा

काठमाडौं, २० बैशाख । आज देशका विभिन्न स्थानमा मेघगर्जन, चट्याङ, हावाहुरी तथा असिनासहित वर्षा हुने सम्भावना रहेको छ।जल तथा मौसम विज्ञान विभाग अन्तर्गतको मौसम पूर्वानुमान महाशाखाका अनुसार आज दिउँसो देशका पहाडी र हिमाली भू–भागमा सामान्यदेखि पूर्ण बदली रहनेछ भने तराई क्षेत्रमा आंशिक बदली रहनेछ।

महाशाखाले देशका हिमाली तथा पहाडी भू–भागका केही स्थानमा तथा मधेस प्रदेशसहित कोशी प्रदेश को तराईका थोरै स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको जनाएको छ। साथै अन्य तराई भू–भागका एक–दुई स्थानमा पनि वर्षा हुन सक्ने अनुमान गरिएको छ।

आज राति भने देशभर सामान्यदेखि पूर्ण बदली रहनेछ। कोशी प्रदेश, मधेस प्रदेश, बागमती प्रदेश, गण्डकी प्रदेश र लुम्बिनी प्रदेश का केही स्थानमा तथा कर्णाली प्रदेश र सुदूरपश्चिम प्रदेश का थोरै स्थानमा मेघगर्जन, चट्याङ, हावाहुरी तथा असिनासहित मध्यम वर्षाको सम्भावना रहेको छ।

विशेषगरी लुम्बिनी प्रदेश को पहाडी भू–भागका एक–दुई स्थानमा भारी वर्षाको सम्भावना समेत रहेको महाशाखाले जनाएको छ।प्रतिकूल मौसमका कारण जनजीवन, कृषि, यातायात तथा दैनिक गतिविधिमा असर पर्न सक्ने भएकाले आवश्यक सतर्कता अपनाउन विभागले आग्रह गरेको छ।