समानुपातिकतर्फको मतपत्र सेतो कागजमा कालो मसीमा छापिने

काठमाडौं, १८ पुस । आगामी निर्वाचनका लागि समानुपातिक प्रणालीतर्फ प्रयोग हुने मतपत्र सेतो कागजमा कालो मसी प्रयोग गरी छापिने भएको छ । राजनीतिक दलहरूले समानुपातिक तर्फको बन्दसूची बुझाएसँगै निर्वाचन आयोग मतपत्र छपाइको तयारीमा अघि बढेको हो ।

निर्वाचन आयोगका प्रवक्ता नारायणप्रसाद भट्टराईका अनुसार हाल समानुपातिक तर्फको मतपत्र छपाइ प्रक्रिया सुरु गरिँदैछ । उनले प्रत्यक्षतर्फको मतपत्र भने मनोनयन प्रक्रिया पूरा भएपछि मात्रै छापिने जानकारी दिए । “समानुपातिक तर्फको मतपत्र छपाइको काम अघि बढ्छ । यसको रङ सेतो कागजमा कालो मसी हुने तय भइसकेको छ,” प्रवक्ता भट्टराईले भने, “प्रत्यक्ष तर्फको मनोनयन माघ ६ गते हुने भएकाले माघ ९ गतेपछि मात्रै त्यसतर्फको मतपत्र छपाइको विषय अघि बढ्नेछ । प्रत्यक्षतर्फको मतपत्रको रङ भने अहिलेसम्म तय भएको छैन ।”

आयोगका अनुसार आगामी २१ फागुन मा हुने निर्वाचनमा समानुपातिक प्रणालीतर्फ ६४ वटा राजनीतिक दल सहभागी हुँदैछन् । तीमध्ये १० वटा दलले एकल चुनाव चिह्न प्रयोग गर्ने भएकाले मतपत्रमा देखिने चुनाव चिह्नको संख्या भने ५८ वटा मात्र रहनेछ ।