- ९ जेष्ठ २०८३, शनिबार / May 23, 2026
चितवन । कृषि तथा वन विज्ञान विश्वविद्यालयमा कृषि विषय अध्ययन गर्ने विद्यार्थी घट्दै गएका छन् । कतिपय आङ्गिक क्याम्पस र सम्बन्धन प्राप्त निजी क्याम्पसमा विद्यार्थी शून्य भएका हुन् ।
विश्वविद्यालय कृषि सङ्कायमा विगतमा चार हजार पाँच सयसम्म विद्यार्थीले कृषि स्नातकका लागि आवेदन दिने गरेका थिए । क्रमशः घट्दै गएर यस वर्ष एक हजार तीन सय ६५ जनाले मात्रै आवेदन दिए ।
एक हजार ५५ जना प्रवेश परीक्षामा उत्तीर्ण भएका छन् । विद्यार्थीको सङ्ख्या घट्दो छ । गत वर्ष एक हजार पाँच सय २३ जनाले आवेदन दिएकामा सात सय ५३ उत्तीर्ण भएका कृषि सङ्कायका डिन प्राडा अर्जुनकुमार श्रेष्ठले बताए ।
चार हजारबढी आवेदन दिने ठाउँमा विद्यार्थी घट्दै गएको उनको भनाइ छ । विश्वविद्यालयको दैलेखको दुल्लुस्थित प्राकृतिक स्रोत व्यवस्थापन कलेजमा गत वर्ष विद्यार्थी शून्य भएका थिए ।
विश्वविद्यालयको केन्द्रीय क्याम्पस रामपुर, कास्कीको पुरनचौर र सिन्धुलीको मरिनबाहेकका आङ्गिक क्याम्पसमा आधाभन्दा पनि कम विद्यार्थी पढाउनुपरेको उनले जानकारी दिए ।
सम्बन्धन प्राप्त सातवटा निजी क्याम्पसमा गत वर्ष विद्यार्थीको अभावमा पठनपाठन हुन सकेन । सातवटै क्याम्पसमा विद्यार्थीको अभावमा पढाइ हुन नसकेको हो ।
