- २९ श्रावण २०८३, शुक्रबार / Aug 14, 2026
सुकुमबासी सङ्घद्वारा चरणबद्ध आन्दोलन घोषणा
डोजर प्रयोग गरी उठिबास गराएको आरोप
प्रधानमन्त्री हटाउन ‘राइट टु रिकोल’ अभियानको तयारी
मेची–महाकाली राजमार्ग चक्काजाम गर्ने योजना
माग पूरा नभए देशव्यापी आम हडतालको चेतावनी
काठमाडौँ, १७ बैशाख । नेपाली कम्युनिस्ट पार्टी (नेकपा) निकट भातृ सङ्गठन अखिल नेपाल सुकुमबासी सङ्घले देशव्यापी आम हडतालसम्मको आन्दोलन घोषणा गरेको छ।
सङ्घले सुकुमबासी बस्तीमा डोजर प्रयोग गरेर जबरजस्ती उठिबास गराइएको विरोधमा चरणबद्ध आन्दोलन सार्वजनिक गरेको हो। सङ्घका अध्यक्ष अमर परियारका अनुसार सरकारको कार्यशैलीप्रति असन्तुष्टि जनाउँदै प्रधानमन्त्री बालेन शाह लाई पदबाट हटाउनुपर्ने मागसमेत अघि सारिएको छ।
बिहीबार काठमाडौँमा आयोजित पत्रकार सम्मेलनमा सङ्घले राज्यले सुकुमबासीमाथि ‘डोजर आतंक’ मच्चाएको आरोप लगाउँदै वैकल्पिक व्यवस्था नगरी उठिबास गराउने कार्य तत्काल रोक्नुपर्ने माग गरेको छ। पहिलो चरणमा सङ्घले भूमिहीन दलित, सुकुमबासी तथा अव्यवस्थित बसोबासीलाई गरिएको वाचा स्मरण गराउँदै सरोकारवाला निकायलाई दबाब दिने कार्यक्रम तय गरेको छ।
यसअन्तर्गत विभिन्न राजनीतिक दलका नेता, जनप्रतिनिधि तथा सरकारी निकायलाई आग्रह र सचेतना अभियान सञ्चालन गरिनेछ।दोस्रो चरणमा भने आन्दोलन थप सशक्त बनाउँदै मेची–महाकाली राजमार्गमा चक्काजाम, देशव्यापी हस्ताक्षर सङ्कलन तथा विरोध कार्यक्रम सञ्चालन गरिने सङ्घले जनाएको छ। साथै ‘राइट टु रिकोल’ मार्फत प्रधानमन्त्रीलाई पदबाट हटाउन अभियान चलाइने उल्लेख गरिएको छ।
यदि यी कार्यक्रमबाट पनि माग सम्बोधन नभए देशभर अनिश्चितकालीन आम हडताल गर्ने चेतावनी सङ्घले दिएको छ। सङ्घले सबै राजनीतिक दल, संघसंस्था तथा आम नागरिकलाई आन्दोलनमा साथ दिन आह्वानसमेत गरेको छ।
