त्रिविका पाँच संकाय नेतृत्वविहीन

काठमाडौं । त्रिभुवन विश्वविद्यालयका पाँच संकाय दुई महिनादेखि डिनविहीन बनेका छन् । कार्यकाल सकिएपछि चिकित्सा शिक्षा, इन्जिनियरिङ, कृषि तथा पशु विज्ञान, मानविकी तथा सामाजिकशास्त्र र शिक्षाशास्त्र संकाय नेतृत्वविहीन बनेका हुन् ।डिनहरूको कार्यकाल दुई महिनाअघि सकिएपछि यी संकाय निमित्तको भरमा छन् ।

तर, कार्यालय सकिएकै डिनहरूले निमित्तको जिम्मेवारी पाएका छन् । चिकित्सा शिक्षामा विद्या साह, इन्जिनियरिङमा शशिधरराम जोशी, कृषि तथा पशु विज्ञानमा किशोर दाहाल, मानविकी तथा सामाजिकमा कुसुम शाक्य र शिक्षाशास्त्र संकायमा चित्र बुढाथोकीले निमित्तको जिम्मेवारी सम्हालिरहेका छन् ।

त्रिवि कार्यकारी परिष्दले अर्को व्यवस्था नहुँदासम्मका लागि उनीहरूलाई नै निमित्तको जिम्मेवारी दिएको हो । यस्तै वन विज्ञान, विज्ञान तथा प्रविधि र व्यवस्थापन संकायका डिनको कार्यकाल पनि आगामी मंसिरदेखि सकिँदै छ । त्रिविका रजिस्ट्रार प्राडा केदार रिजालले दुई साताभित्र कुन संकायमा को नियुक्ति गर्ने भन्ने विषय टुंगो लाग्ने बताए । डिन बन्नका लागि एकै व्यक्ति दुईपटक डिन बन्न नपाउने, कम्तीमा १० वर्ष प्राध्यापनरत प्राध्यापक वा सहप्राध्यापक भएकोलगायत योग्यता हुनुपर्नेछ ।