- २९ श्रावण २०८३, शुक्रबार / Aug 14, 2026
काठमाण्डौ, २१ पुष । बेलायतमा कामको अनुमति दिलाइदिने बहानामा ठगीका घटना बढेको भन्दै लण्डनस्थित नेपाली दूतावासले सचेत रहन आग्रह गरेको छ ।
दूतावासका अनुसार कतिपय बेलायतमै रहेका तर कामको खोजीमा रहेका नेपालीसमेत ठगीमा परेको गुनासो बढिरहेको छ । ठगीमा संलग्न व्यक्तिहरूमा कतिपय नेपालीमूलका व्यक्ति नै रहेको बुझिएको छ ।
चिनेजानेकै नेपालीमार्फत तेस्रो देशका व्यक्तिसँग सम्पर्क गराइ ठगीमा पारिएको गुनासो पनि प्राप्त भएको दूतावासको विज्ञप्तिमा उल्लेख छ । यस्ता कार्यहरू नेपाल र बेलायत दुवै देशको कानुनअनुसार दण्डनीय अपराध भएको दूतावासले स्पष्ट पारेको छ ।
ठगीका घटनामा परेका पीडितलाई नेपालका सम्बन्धित अनुसन्धान निकाय तथा बेलायतका स्थानीय प्रहरी र नेशनल एण्टी फ्रड नेटवर्क (एक्सन फ्रड) मा उजुरी दिन सुझाव दिइएको छ ।
बेलायतका लागि कार्यवाहक नेपाली राजदूत विपिन दुवाडीले प्रमाणसहित आउने पीडितको न्यायका लागि सहजीकरण गर्न दूतावास तयार रहेको बताउनुभएको छ । समस्यामा परेका नेपालीलाई दूतावासको इमेलमार्फत वा +४४–७४०४९३९२७४ नम्बरमा सम्पर्क गर्न अनुरोध गरिएको छ ।
