आजबाट श्रृजनशील लघुवित्तको आईपीओ खुल्यो

काठमाडौं । आजबाट (भदौ १५) श्रृजनशील लघुवित्त वित्तीय संस्था लिमिटेडले धितोपत्रको प्राथमिक सार्वजनिक निष्कासन (आईपीओ) बिक्री खुला गरेको छ । जारी पुँजी १० करोड ९३ लाख ७५ हजार रुपैयाँको कूल ३६ प्रतिशत सार्वजनिक निष्कासन (आईपीओ) लद्युवित्तले खुला गरेको छ । उक्त लघुवित्तले नेपाल धितोपत्र बोर्डबाट प्रतिकित्ता १०० रुपैयाँ बराबरमा तीन करोड ९३ लाख ७५ हजार रुपैयाँ बराबरको तीन लाख ९३ हजार ७५० कित्ता सेयर सार्वजनिक निष्कासन गर्ने अनुमति पाएको बताइएको हो ।

उक्त सार्वजनिक निष्कासन हुने सेयरमध्ये जारी पुँजीको ०.५ प्रतिशतले हुन आउँने ५४७० कित्ता कर्मचारीहरूका लागि र सर्वसाधारणका लागि छुट्याइएको सेयरमध्ये पाँच प्रतिशत अर्थात् १९ हजार ६५० कित्ता सेयर सामूहिक लगानी कोषहरूलाई सुरक्षित गरेको बताइएको छ ।

त्यसैगरी बाँकी रहेको करिव ३ लाख ६८ हजार ५९० कित्ता सेयरका लागि सर्वसाधारण लगानीकर्ताले आवेदन दिन सक्नेछन् । इच्छुक लगानीकर्ताले सि–आस्वा सदस्य बैंक तथा वित्तीय संस्था र मेरो सेयर वेबसाइट तथा एपमार्फत आवदेन दिन सक्नेछन् ।

कम्पनीका अनुसार लगानीकर्ताले न्यूनतम १० कित्तादेखि अधिकतम् १ हजार कित्तासम्मका लागि आवेदन दिन सक्नेछन्। कम्पनीले आईपीओमा छिटोमा १९ भदौ र उक्त अवधिमा पर्याप्त आवेदन नपरेमा आवेदन दिने अवधि २९ भदौसम्म थप हुने जनाएको छ ।