- २० आश्विन २०८३, मंगलवार / Oct 6, 2026
रानीपोखरीमा आकाशे पानी जम्मा पारिदै ।
प्राधिकरणद्वारा विभिन्न विधिको प्रयोग ।
वर्षा र मनसुनको पानीबाट नभरिए मेलम्चीको पानी हालेर भर्ने योजना ।
२०७७ भाद्र ८, बागमती प्रदेश । ऐतिहासिक तथा पुरातात्विक सम्पदा रानीपोखरीमा पानी जम्मा गर्ने काम भइरहेको छ । पुनर्निर्माणको काम सम्पन्न भएसँगै पानी जम्मा गर्ने काम भइरहेको हो ।
दरबार हाइस्कुलको छानाको पानी पोखरीमा हालेर पानी जम्मा पार्ने काम भइरहेको जनाइएको छ । रानीपोखरी पुनर्निर्माण अन्तर्गत पोखरीको पिंधमा कालो माटो र ईंटा ओच्छ्याउने तथा पानी रहने भागको पर्खाल निर्माणको काम सकिएसँगै वर्षाको पानी जम्मा गर्ने काम भइरहेको प्राधिकरणले जनाएको छ ।
नेसनल लाइब्रेरी, विश्वज्योति हलको छतको पानी जम्मा गर्न डिजाइनको काम पनि सम्पन्न भएको छ । प्राधिकरणले टुँडिखेलमा जम्मा भएको पानी ल्याउने तयारी भइरहेको प्राधिकरणले जनाएको छ । प्राधिकरणले अहिले पानी जम्मा गर्न विभिन्न विधि प्रयोग गर्ने तयारी गरिरहेको छ ।
प्राधिकरणले वर्षा र मनसुनको पानीबाट रानीपोखरी नभरिएमा मेलम्चीको पानी हालेर भर्ने योजना विकल्पका रूपमा अघि सारेको प्राधिकरणले जनाएको छ ।
प्राधिकरणले रानीपोखरी पुनर्निर्माण २ वैशाख २०७७ अर्थात् पाँच वर्षअघि भूकम्प गएकै दिन सक्नेगरी काम गरिरहेको थियो । कोरोना भाइरससँगै लकडाउनका कारण पूर्वनिर्धारित समयमा भने काम सम्पन्न हुन नसकेको हो ।
