जाजरकोटमा जिप दुर्घटना,वडाध्यक्षसहित ५ जनाको मृत्यु

जाजरकोट । जुनिचाँदे गाउँपालिकामा जिप दुर्घटना हुँदा वडाध्यक्षसहित पाँच जनाको मृत्यु भएको छ । सदरमुखकाम खलंगाबाट जुनिचाँदे जाँदै गरेको भे १ ज ९३५ नम्बरको जिप बुधबार गाउँपालिका १ औलखोलामा दुर्घटना भएको हो ।

दुर्घटनामा ५ जनाको घटनास्थलमै मृत्यु भएको र दुईजना बेपत्ता रहेको जिल्ला प्रहरी कार्यालय जाजरकोटले जनाएको छ । मृत्यु हुनेमा जुनिचाँदे गाउँपालिका ११ का अध्यक्ष अमरबहादुर शाही, वडानम्बर ११ का कृतिबहादुर शाही, खेमबहादुर शाही, वडानम्बर ५ का मालिका बस्नेत र कृष्णबहादुर शाही रहेका छन् ।

बेपत्ता भएका अन्य दुईजनाको खोजी भइरहेको डीएसपी किशोर श्रेष्ठले बताए । जिप सडकबाट करिब ५०० मिटर तल खोलामा खसेको थियो ।