हिमपात हुदा लिमीमा फसे विदेशीसहित १२ जना

हुम्ला । नाम्खा गाउँपालिकाको हिल्सा र लिमीका पदयात्रामा स्लोभेनियाका चार नागरिक, तीन पथप्रदर्शक र पाँच स्थानीय तुम्लिङमा फसेका छन् ।

पर्यटकीय क्षेत्र नाम्खा गाउँपालिकाको लिमीको पदयात्रा सकाएर सिमकोट फर्किने क्रममा बाक्लो हिमपातले बाटो छिचोल्न नसकेपछि उनीहरु फसेको प्रमुख जिल्ला अधिकारी गणेश आचार्यले बताए ।

हिमपातका कारण नाम्खा गाउँपालिका–६ को लिमीको न्यालु लेकको बाटो अवरुद्ध हुँदा बाटो छिचोल्न नसकेर विदेशीसहित १२ जना रोकिएका हुन् ।

असोज २२ गते सिमकोटबाट हिल्सा हुँदै लिमीको पदयात्रामा गएका टोली र पदयात्रापछि टोली न्यालु लेक हुँदै पैदलमार्गबाट सिमकोट आउने कार्यक्रम थियो । न्यालु लेकमा बाक्लो हिमपात हुँदा उक्त टोली उतै रोकिनुपरेको पेमा लामाले बताए ।