राष्ट्रकवि माधवप्रसाद घिमिरेको निधन

२ भदौ २०७७ काठमाडौं । राष्ट्रकवि माधवप्रसाद घिमिरेको निधन भएको छ। १ सय १ वर्षको उमेरमा मंगलबार अपराह्न करिब साढे ५ बजेतिर आफ्नै निवास लैनचौरमा निधन भएको पारिवारिक स्रोतले बताएको छ ।

घिमिरेको अन्त्येष्टि भोलि बुधबार गर्ने तयारी परिवारले गरेको छ ।अन्त्येष्टिको सम्पूर्ण जिम्मेवारी नेपाली सेनाले लिएको छ ।उनको जन्म विं.सं. १९७६ असोज ७ गते लमजुङको पुस्तन गाउँमा भएको थियो । घिमिरे स्वच्छन्दतावादी भावधारा र परिष्कारवादी शैली अपनाएर साहित्य सिर्जना गर्ने साहित्यकारका रूपमा चिनिन्छन् ।

उनले कविता, खण्डकाव्य, गीतिनाटक, कथा, अनुवाद लेख प्रबन्धजस्ता अनेकौं विधा उपविधाहरूमा सिर्जना दिँदै आइरहेका छन् ।